ANG maguwang nga babaye ni Kawhi Leonard sa Los Angeles Clippers ang gipasakaan og kasong pagpatay sa usa ka tiguwang sa California sa usa ka resort Casino, matod sa report sa US Media kagahapon.
Si Kimesha Monae Williams ang usa sa giaresto ug gikasohan sa pagpangawat ug pagpatay sa usa ka 84-anyos nga babaye sa Penchaga Resort Casino sa Temecula, California, mga 120 kilometros sa southeast sa Los Angeles.
Matod sa taho sa Riverside Press-Enterprise nga ang 35-anyos nga Williams maguwang sa NBA Superstar nga si Leonard.
Si Williams ug ang usa ka 39-anyos nga si Candace Tai Townsel ang gibilanggo nga dili makapiyansa ug gikatakdang moatubang sa korte karong Septiyembre 19.
Dugang taho sa California Police nga ang insidente nahitabo niadtong Agusto 31 sa buntag sa dihang si Afaf Anis Assad ang giataki sa duha ka mga tawo sulod sa pansayan sa Casino.
Matod pa nga nabuak ang bagol-bagol ni Asad, kansang pitaka gikawat.
Ang biktima namatay sa hospital, dugang sa taho sa Press-Enterprises.
Ang kapulisan sa Riverside misugyot sa huwes nga di papiyansahon si Williams kay tingali og mosibat kini sa halayong dapit ilabi na kay kuwartahan ang pamilya niini.
Si Leonard nagdako sa Riverside ug bag-ohay lang nga nakapirma og tulo ka tuig sa Clippers nga mobalor og $103 million.
Ang 28 anyos nga star player maoy nangulo sa Toronto Raptors ngadto sa championship sa miaging season ug maoy nahimong most valuable player sa finals sa ikaduhang higayon sa iyang career. Niadtong 2014 nasakmit gihapon niya ang pasidungog sa dihang didto pa siya sa San Antonio Spurs. (JBM, AFP)