NAKAAABANTE sa quarter-finals ang defending champion Team USA human nila gipangbuntog si Giannis Antetokounmpo ug ang Greece, 69-53, niadtong Sabado sa gabii sa usa sa labing gikaintapang duwa sa 2019 FIBA Basketball World Cup sa China.
Ning sangkaa, tataw ang motibo ni coach Gregg Popovich ug sa Team USA – pugngan si Antetokounmpo, kinsa maoy kasamtangang MVP sa National Basketball Association (NBA) ubos sa kampo sa Milwaukee Bucks.
Ang Team USA ningpahamtang og grabe ka hugot nga depensa ngadto kang Antetokounmpo diin tabangan kanunay duha o tulo ka mga tawo ang magdepensa sa gitawag og “The Greek Freak.”
Ning duwaa, gipakita sa Team USA nga mas mahinungdanon gyud ang depensa kumpara sa opensa.
“It was a good test and helped us get better. That’s our goal to get better in every one of these games,” matod ni Popovich.
“But that’s expected from 12 guys who have never played together before . . . each day that we have we hope that our execution can get better and better, and as coaches learn what’s best for these guys.”
Nagtinabangay sa pagdepensa kang Antetokounmpo mao sila si Harrison Barnes, Khris Middleton, Jaylen Brown, Marcus Smart ug Myles Turner.
“We just wanted to make it as hard as possible for him, and I think we did a good job,” asoy ni Smart.
Bisan sa ka grabe ka hugot sa depensa sa Team USA ngadto kaniya, si Antetokounmpo nakamaneho gihapon pagmugna og double-double nga 15 ka mga puntos ug 13 rebounds.
Human sa hugot nga kombati sa 1st quarter, ang batan-ong puwersa sa Team USA hinayhinay na’ng ningpagawas sa ilang kamangtas isip usa ka puwersa.
Gipangulohan ni Kemba Walker ang balanseng ataki sa Team USA pinaagi sa iyang 15 puntos samtang nidugang og 10 puntos si Donovan Mitchell. (AP, ESL)