LIMA ka tuig na nga giingong gi-abuso sa amahan ang iyang kaugalingon nga anak hinungdan sa pagkasikop niini niadtong Septiyembre 6 sa Zone 2, Barangay Agusan, Siyudad sa Cagayan de Oro.
Ang 13-anyos mismo ang nisumbong sa kapulisan sa gihimo sa iyang amahan nga si Gealbirt (bansagon gipugngan), 39, kanhi miyembro sa Philippine Military Intelligence Group base sa nakuhang identification card, bulag sa asawa kinsa tua gawas sa nasud.
Sa inisyal nga impormasyon, nitaho sa kapulisan ang bata tungod kay dili na maantus ang gihimo sa iyang amahan sukad pa niadtong nag-edad kini og 8-anyos diin giingong ulahi kining gilugos niadtong Huwebes, Septiyembre 5.
Sa impormasiyon gikan sa Cagayan de Oro Police Office (Cocpo) pinaagi kang Police Major Evan Viñas, tigpamaba sa Cocpo, gikabutyag nga sa gihimo nga police operation nasikop si Gealbirt ug nakuhaan pa kini og armas ug buhing bala.
“Dunay mireport nga usa ka minor nga bata nga nihilak pag-ayo, nag-report sa ato nga gi-rape siya sa iyang papa,” matud ni Police Captain Mario Mantala, hepe sa Police Station 6 (PS6) sa Puerto.
Sa gihimo nga imbestigasyon ngadto sa amahan, walay duha-duha nga gi-angkon niini ang iyang gihimo sa iyang anak tungod kay matintal siya nga makitang maligo ang iyang anak.
Mibutyag usab kini nga iyang hilabtan iyang anak ayha hatagan og kwarta.
Nakuha gikan sa posisyon sa suspek ang kalibre 357 nga dunay unom ka mga buhing bala.
Ang suspek ang kasamtangang nagtingkagol sa PS6 sa Puerto ug posibleng mag-atubang og kasong pagpanglugos o multiple rape case lakip na sa paghupot og armas.
Simple lang usab nga nangayo og pasaylo ang suspek sa iyang gihimo ug andam nga dawaton ang bisan unsa nga silot kaniya.