SELOS ang gituohang hinungdan sa pagpang-hostage sa usa ka amahan sa iyang 4 ug 5-anyos nga mga anak niadtong Septiyembre 6 pasado ala 1:33 sa hapon sa Upper Kiam-is, Barangay Lumbia, Siyudad sa Cagayan de Oro.
Bitbit ang Granada, nihulga ni Manny Bamuya, 44, barangay tanod ug kanhi miyembro sa Citizens Armed Forces Geographical Unit (Cafgu), sa Lanao del Sur nga pabuthon kini kon mosumbong sa kapulisan.
Samtang ang asawa nakaangkon og mga bun-og ug mga pangos sa lawas tungod sa paningkamot nga makalingkawas gikan sa iyang bana.
Sa pakighinabi sa SunStar Superbalita kang Police Major Evan Viñas, tigpamaba sa Cagayan de Oro Police Office (Cocpo), gibutyag niini nga posibleng tungod sa selos ngadto sa iyang asawa nahimo sa bana ang pagpang-hostage sa iyang mga anak.
Nasayran nga nagselos ang amahan tungod kay kanunay magtambay sa tunghaan ang iyang asawa. Samtang gibutyag sa asawa niini nga anaa siya sa tunghaan tungod kay iyang bantayan ang iyang mga anak nga nag-eskwela.
"Selos sa asawa hinungdan kay sige yampungad sa eskwelahan ang asawa, na pacify ra human 30 minutes," matud ni Viñas.
Samtang dali usab nga nakataho ang mga barangay tanod ngadto sa kapulisan atol sa hitabo.
Sa pagresponde sa kapulisan, napakalma ra ang amahan sulod sa 30 minutos pinaagi sa estratihiya sa pagpangulo ni Police Captain Dennis Ebsolo ug nakuha gikan sa amahan ang usa ka granada.
Gikustodiya na sa Police Station 8 (PS8) sa Lumbia ang amahan alang sa posibleng pagpasaka og kaso.