USA ka 70-anyos nga ex-convict, kinsa gipagawas ubos sa Good Conduct Time Allowance (GCTA) law, nitahan ngadto sa Consolacion Police Station niadtong Sabado, Septiyembre 7, 2019.
Si Virgilio Batulan, 70, residente sa Sitio Libo, Tayud, lungsod sa Consolacion, buluntaryong nitahan duha ka adlaw human si Presidente Rodrigo Duterte niluwat og 15 ka adlaw nga ultimatum, alang sa pagtahan sa mga konbiktado nga nakagawas sa New Bilibid Prisons (NBP) pinaagi sa GCTA.
Moabot sa 1,914 ka mga konbiktado sa NBP ang nakagawas na subay sa GCTA.
Gibuhian siya sa NBP, siyudad sa Muntinlupa, niadtong Oktubre 26, 2018, matod ni Police Major Vernino Noserale, hepe sa Consolacion Police Station, kinsa nibutyag nga i-turnover ang nitahan sa ilang ulohang buhatan sa kapulisan.
Duha sa tulo ka mga Chiong 7 convicts sa paglugos-pagpatay sa magsuong Marijoy ug Jacqueline Chiong ang unang ningtahan usab, duha ka mga adlaw human si Presidente Rodrigo Duterte nidemanda pagpatahan kanila sulod sa 15 ka adlaw.
Sila si kanhi convicts Ariel Balansag ug Alberto Caño, kinsa gipagawas sa miaging buwan pinasikad sa GCTA law, ningtahan niadtong Biyernes, Septiyembre 6, 2019.
Naa sila karon sa New Bilibid Prison, gibutyag ni Justice Undersecretary Markk Perete sa SunStar Cebu.
“Bureau of Corrections has confirmed their surrender. Based on the Bureau’s report, the two have been processed for re-commitment and are already inside (the) Bilibid,” matod ni Perete. (WBS, RRM)