ANG tibuok bulan sa Septiyembre giila dinhi sa Sugbo isip bulan alang sa mga magsisibya. Ang Cebu Broadcasters Month gipasiugdahan sa Kapisanan ng mga Brodkaster ng Pilipinas (KBP)- Cebu Chapter, kansang katuyoan mao ang pagbug-os sa mga magsisibya ka usa sa matag tuig.
Nagkadaiyang kalihukan ang giumol sa organizing committee. Niadtong aktibo pa ta sa panibya, kanunay nga gisangon nako ang paglingaw sa mga bisita pinaagi sa live concert gikan sa mga musikero nga nihatag og libreng tukar.
Hilabihan ka halandumon ang maong mga panahon. Samot na kong iapil pa ang mga tuig nga diin kita nagkadusingot ug mabasa tungod sa dautang tiyempo pagpinangita og ika-report. Hinapos nga bahin sa 1985, wa tuyoa nga gi-interview ko alang sa pagka reporter.
Kinsay magtuo nga mahimo ko nga reporter nga di man ako ang nangaplay sa maong trabaho. Ang akong mga higala sa boarding house nga akong gipuy-an hilom nga nagpadala sa akong resume sa sibyaanang Bombo Radyo. Nahibulong ko nganong gipatunga ko para sa interview nga wa man ko mo-apply.
Ako nalang gisakyan kay wa man sab koy trabaho ug suwerte nga nadawat. Ang labing una nga coverage nga akong naapilan nga labihan kakulba mao ang People Power dinhi sa Sugbo nunot sa pag-alsa sa katawhan batok sa rehimeng Marcos didto sa Edsa.
Human niadto mao ang mga coverage labot sa problema sa insureksiyon. Mga coverage sa patay nga naglambigit sa Sparrow Unit sa NPA ug militar.
Coverage sa sinukliay sa mga bala tali sa duha ka pundok sa bukirang barangay sa Sapangdako. Human sa duha ka tuig sa Bombo nibalhin ko sa laing sibyaanan sa Mandaue City, ang DYSB.
Dinhi nagsugod ang dakong kalbaryo hangtod nga nawad-an ko og trabaho. Nanira ang estasyonan human sa bagyong Ruping. Labihan ka krisis kay ang mga announcer naman ang mopalit og krudo aron mapaandar ang generator og makasibya.
Giputlan mi og kuryente kay wa ka bayad. Nauna og putol ang telepono ug tubig. Human manira sa tabang sa akong ninong sa kasal Sammy Gello-ani nga aktibo kaayo sa pamoksing, naka kuha ko og lisensiya gikan sa Games and Amusement Board isip boxing ring announcer sud sa dul-an sa napulo ka tuig.
Nagpadayon ko pagsaka sa ring bisan niadtong panahon nga nakatrabaho nako sa ABS CBN Cebu sa pagka 1991.
Gani pinaagi sa among manager nga si anhing Danny Bernardo, gihatagan ko og break nga mahimong boxing commentator pinasgi sa tulomanon nga Sunday Knockout. Usa ka exclusive boxing presentation pinaagi sa pagpakig-alayon ni Cebu Boxing Patron Antonio Lopez Aldeguer. Ang tanan niya nga promotion isalida sa Sunday Knockout program.
Sama sa mga away nila ni Edito Villamor, Gerry Peñalosa, ug ubang ALA Boys, sa ato pa gikan sa pag-anchor hangtod sa pagpanguha og mga report sa nagkadaiyang isyu apil na ang sports way giliatan ang matag adlaw nga kumbati isip usa ka magsisibya.
Hangtod nga kini natapos sa miaging tuig. Karon nangandam na sab sa posibling pagpadayon sa nabiyaan nga career. Sa mga nagplano nga mosud ning maong matang sa propesyon, kugi og diskarte ray pohunan pagsungasong sa daghang hagit nga sagubangon matag adlaw.