NAGLISOD ang Criminal and Investigation Detection Group (CIDG) 7 sa ilang imbestigasyon tungod sa problema sa komunikasyon tali sa dul-an sa 200 ka mga langyaw nga kadaghanan Chinese nationals nga nangasikop tungod sa giingong llegal online gambling operations sa dakbayan sa Lapu-Lapu niadtong Sabado, Septiyembre 7.
Sumala ni CIDG 7 Deputy Chief Hector Amancia, naningkamot sila nga ilang mahimo ang booking procedure sa 48 ka mga babaye ug 38 ka mga lalake nga gipangtanggong.
“We are looking for an interpreter but we already coordinated with the Chinese consulate regarding the arrest of these foreign nationals,” matod n Amancia.
Ang mga imbestigador magsige na lang og sinyas aron pagkuha sa basic information sama sa ilang pangalan, edad ug uban pa sa mgadinakpan.
Sa pagkakaron, ang mga imbestigador padayong nagkolekta sa daghang ebidensiya nga naglakip sa computers, laptops, cellular phones ug illegal gambling paraphernalia.
Gironda sa CIDG 7 ang usa ka condominium sa Barangay Mactan tungod sa giingong illegal online gambling.
Matod ni Amancia, ang ilang operasyon subay sa search warrant nga giluwatan ni Judge Soliver Perras sa Regional Trial Court (RTC) Branch 10.
Nilanat og walo ka buwan nga gipaubos sa surveillance ang maong online gambling.
Nagpatuo kini nga usa ka business process outsourcing (BPO) nga mao usab ang ilang gipakita nga papeles sa mga sakop CIDG 7. (JOB, RRM)