BISAN sa kakulian sa iyang physical nga panglawas, wa kini makapugong ni Alma Pateres, 54, nga moapil sa Walk with Mary, pahinungod sa adlaw nga natawhan sa Mama Mary niadtong Dominggo, Septiyembre 8, 2019.
Si Pateres, nagsakit og polio, ang usa sa 9,000 ka Marian devotees nga nisalmot sa tinuig nga prosesyon nga nagsugod alas 4 sa kaadlawon gikan sa Fuente Osmeña circle paingon sa Plaza Independencia, siyudad sa Sugbo, diin gihalad ang misa alang sa birthday ni Blessed Virgin Mary.
Sakay sa wheelchair, samtang giabagan sa iyang higala, matod ni Alma nga naandan na niya nga gimbuhaton sud sa pipila na ka tuig ang pagsalmot sa tinuig nga kalihokan nga gipasiugdahan sa artsidyosesis sa Sugbo.
Dugang niya mao kini ang iyang paagi sa pagsulti og salamat ngadto kang Mama Mary.
Sama kang Pateres, si Joel Estorco, 45, kuyog sa iyang asawa ug duha ka mga anak, nga ang pag-apil nila sa prosesyon alang kang Mama Maria usa ka maayong oportunidad alang nila aron sila maghiusa isip usa ka pamilya.
Sigon sa amahan nga nigahin sila og oras alang sa maong kalihokan tungod kay lahi kon personal kini nga buhaton. Ug nag-ampo nga mahatagan sila og maayong panglawas ug relasyon isip pamilya.
Si Mark Castillo, usa ka maestro, nipaambit nga usa siya ka deboto sa Our Lady of the Miraculous Medal sukad sa iyang pag high school.
Ang mga deboto, samtang naggunit og mga kandila nga nagsiga, nagrosaryo usab samtang naglakaw paingon sa Plaza Independencia.
Sa wala pa ang misa, kapin sa 30 ka mga imahen ni Mama Mary nga gikan sa lainlaing mga parokya sa Sugbo ug pribadong mga deboto ang gibendisyonan.
Kini sama sa mga imahen sa Our Lady of Reconciliation, Our Lady of China, Our Lady of all Nations, Our Lady of Consolation, Our Lady of Hope, Our Lady of Manaoag, ug ang Our Lady of Fatima.
Sa iyang wali, si Msgr. Joseph Tan, tigpamaba sa artsidyosesis, nipahinumdom sa mga matinuohon kon unsa kamahinungdanon ang kalihokan.
“The walk with Mary is not just a pageantry of the different images of (the) our lady. It is not a sign of our devotion to send our greetings to our lady on this special day. It is, more importantly, a reminder for us that in our Christian life, we need to walk with Mary in order to be faithful to God’s plan for us,” pasabot niya.
Iyang gipahimug-atan nga sa matag kinabuhi, ang tawo makasinati og iyang kaugalingon nga version sa anunsiyasyon.
“At one point in our life, we have our own personal annunciations. We do know that a change is going to happen in our lives. Like a young person finally deciding that he has enough with pornography, of vices, and of hatred,” dugang ni Tan.
Bisan sa pamahayag ni Presidente Rodrigo Duterte nga dili na angay nga saulogon ang ika-500 nga kasumaran sa pag-abot sa Kristiyanismo dinhi sa nasod karong 2021, matod ni Tan, ang kasaulogan mahitungod sa maayong mga butang sa bati nga sitwasyon.
“We could not deny that colonization is part of our history but it was how it went not only in our country but in other nations as well. What we are celebrating is not the colonization but the fact that despite the dark history, we found the light brought to us by our faith. We see the triumph of goodness in evil,” dugang ni Tan.
Si Duterte nihimo sa maong pamahayag atol sa iyang pagbisita sa mga biktima sa landslide sa dakbayan sa Naga, habagatang Sugbo, niadtong Biyernes, Septiyembre 6.
Samtang, sigon ni Police Major Joemar Pomarejos, hepe sa Waterfront Police Station sa Cebu City Police Office CPPO), way natala nga dagkong mga insidente sa tibuok
selebrasyon. (WBS, JJL)