MGA tinun-an nga nigamit og drugas nigara na usab?
Kini ang gisusi sa siyudad sa Talisay ilabi na sa mga night high school ug gi-monitor sa mga barangay opisyal tinabangan sa kapulisan, ang mga tunghaan.
Giangkon ni Police Major Orlando Carag, Jr., hepe sa Talisay Police Station, nga gipabutangan niya og mga pulis ang vicinity sa mga tunghaan, ilabi na sa kagabhion.
Human nga nakig-alayon kanila si Tabunok Barangay Kapitan Benjie Cabigas kay nakadawat og sumbong gikan sa mga magtutudlo kalabot sa mga tinun-an nga gihulagway nga mga manggamitay og ilegal nga drugas.
“Isa sa mga project namin ni kap (Benjie Cabigas) to check yung mga night schools sa area nya, though dine-deployan ko na yung area, but yung totally talking with the school heads, gagawin natin,” matod ni Carag.
Dugang ni Carag nga bisan sa ubang barangay nakig-alayon na usab siya sa kadagkuan sa mga tunghaan sa mga night school.
Giangkon ni Cabigas nga naalarma sila sa maong mga batan-on human usab nga sa miaging school year nga mga tinun-an, aduna gyuy usa nga ilang gisakmitan og armas, nga gidala diha sa tunghaan.
“Users kasagaran. Ato sa gitan-aw ug gisusi, kon kinsa o unsang paagiha nga nakasud ni diha sa mga tunghaan. Naay assumption ang mga magtutudlo nga makita nga bayolente ang usa ka tinun-an, in fact naa mi nadakpan sa usa sa mga tunghaan, through our chairman sa peace and order, nga nagdala og armas nga estudyante. So, probably ma-link gyud na nato sa pagkalambigit sad sa ginadili nga drugas,” asoy ni Cabigas.
Gihingusgan usab sa Talisay Police Community Relations ang ilang gihimo nga pagduaw sa mga tunghaan pagpahibawo ug pagpasabot sa mga bating’ epekto nga makuha gikan sa ilegal nga drugas.
Gihimug-atan karon ni Cabigas nga dili lang ang paghatag og importansya sa sports activities sa mga bata aron malikay sa bisan unsa nga bisyo.
Kundi lakip na ang pagpakig-alayon sa mga non-government organization, alang sa personality development sa mga batan-on ilabi na nga out-of-school youth.
“Sa ato man gud kining mga bata, ilabi na ning sila nga wala nagtungha, poor gyud ilang judgement when it comes to gusto nila nga mahitabo sa ilang kaugalingon," dugang ni Cabigas. (B)