SECTIONS
Thursday, September 19, 2019
SUPERBALITA CEBU

Sugilanon: Welcome, Ernie Boy!

SA PAG-ABOT ni Ernesto (Ernie Boy o Erning) sa ‘langit’ gialirungan dayon siya sa mga ‘bathalad’ nga nahiuna kaniya dinhi. Mga magsusulat sila kaniadto didto sa kalibutan, Malipayon silang misugat kang Ernie nga gibati sab og dakong kalipay nga nakita niya ang mga karaang sagabay nga dakog gikatampo sa kalamboan sa katitikang Sugbuanon ug sa pagpatunhay sa pinulongan nilang Lapu-Lapu ug Humabon.

Misugat kaniya sila si Urias, Renato, Dionisio, Pantaleon, Melito, Melchor, Leonilo, Frank, Temistokles, Fidel, Romeo, Zosimo, Franklin, Jose, Teofy, Raul, Jesus, ug Gumer. Nakita pod niya sila si Alfredo, Ramon, Paul, Andres ug Winefredo.

“Dugay ming nagpaabot nimo, buanga kang dako!” matod ni Pantaleon nga hugot kaayong migakos kang Ernie. “Kon wa pa ka moabot karon, I’ll kill you!” Si Eyon kauban ni Ernie nga magtutudlo kaniadto ug suod kaayo sila nga managhigala. Dungan sila nga nahimong ‘writing fellow’ sa Silliman ‘writers workshop’ niadtong 1972. Nahimo sab siyang pamuno sa Bathalad. Nanghugyaw pagpangatawa ang nag-alirong kanila.

“Nagpaabot ra man ko sa hukom sa Ginuo anus-a ko Niya ibalhin dinhi,” ni Ernie. “Ug karon ania na ko. Gikalipay ko nga magkahimamatay tang tanan pag-usab.”

“Kumusta man ang Bathalad Sugbo karon, Erning?” ni Fred nga mechanical engineer ug production manager sa usa ka pabrika sa mga medisina sa didto pa siya sa kalibutan.

“Okey man, Fred. Mga batan-on na ang nagpalihok niini. Ang mga opisyal karon gipangulohan ni Cheeno Borden, presidente, ug Kevin Lagunda, bise-presidente. Mga aktibo silang sakop sa kapunongan. Gani sila ang nanimon sa pagsaulog sa ika-50 nga anibersaryo sa Bathalad Sugbo karong tuiga,” ni Ernie. “Malipay sab kong ibalita kaninyo nga ang Bathalad Sugbo maoy nakadawat karong tuiga sa ‘Pedro Bucaneg Award for longest writers’ group to exist’ gikan sa Unyon ng mga Manunulat sa Pilipinas (UMPIL).”

“Ang Superbalita, Ning, kumusta pod?” misal-ot si Winnie. “Ikaw may mipuli nako pagka language consultant.”

“Okey kaayo, Win! Misamot kalig-on. Si Lam mipuli nako adtong 2005. Daghan nang bag-ong mga magsusuwat ang napatikan sa ilang balak ug sugilanon sa Superbalita nga dako pod og gikatampo sa kalamboan sa literatura ug pinulongang Sugbuanon. Magsaulog ang Superbalita sa iyang ika-25 nga sumad karong Oktubre 23 ning tuiga.”

“Unsa man nang Council of Past Presidents sa Bathalad Sugbo?” nangutana si Ury.

“Ako ang nagsugyot ana nilang Butch ug Lam. Ang ‘council’ magpaluyo sa kalihukan sa kapunongan ug mohatag ‘moral support’. Ang mga sakop niini mao ang mga buhi pa nga mga presidente, sila Butch, Roger, Lam, Myke, Josua, Genica, Jeremiah, Dodong Rolando ug Karla.

Buhi pa si Tony ug Goddy pero may gihambin nga balatian sa lawas,” saysay ni Ernie.

“Duna diay duha ka babaye nga na-presidente, no?” ni Rene.

“Oo, Ren. Maayo manuwat og balak Binisaya sila Genica ug Karla,” ni Ernie. “Ug daghan na sab nga mga batan-ong babaye nga naikag sa pagpanuwat sa Binisayang Sugbuanon.

Sa akong nahibaw-an usa na ka sabdyek ang Cebuano Literature sa UP, USC ug ubang kolehiyo nga nagtanyag og kursong Masscom ug Journalism.”

“Maayo kana nga development!” timang ni Diony.

Wala motingog si Ernie. Miigham siya. Gibati niya nga nag-uga ang iyang tutunlan. “Unsa man, way tagay dinhi?” matod niya dayong bahikhik,

“Mga buang dagko! Duna!” matod ni Eyon. “Mangayo ko kang San Miguel!” Ug milakaw si Eyon. Sa iyang pagbalik may dala na siyang usa ka botelya nga hinebra ug usa ka kupa. “Magtagay ta sa pag-abot sa agila sa Sugbuanong pamalak!” ni Eyon nga miisa sa botelya, “Welcome, Ernie Boy!”

Ug nag-inom sila nga nagtindog-tindog lang, sama sa ilang gibuhat kaniadto sa didto pa sila sa kalibutan, sa ayuhanag relo ni Fidel atubangan sa Hope Pharmacy sa dalan Leon Kilat ug sa baligyaanan og mantalaan ni Ramon sa Eden Theater sa dalan Colon.

(KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph