TACURONG CITY -- Hugtanon nga gilimod sa tigpamaba sa Bangsamoro Islamic Freedom Fighter (BIFF) nga si Kumander Abu Misry Mama nga duna silay kalabutan sa pagpamomba sa Isulan, Sultan Kudarat niadtong miaging adlaw.
Matud niya nga dili mahimo sa BIFF nga puntingon ang mga inosenteng sibilyan sa ilang gipakigbisugang edolohiya.
Target lang sa BIFF ang mga kampo sa militar sa mga probinsiya sa Maguindanao ug North Cotabato.
Dugang ni Mama nga hinimuan sa ubang grupo ang pagpamomba sa Isulan nga dunay kaugalingong interes.
Kahinumdoman nga walo ka tawo ang naangol sa pagbusikad sa improvised explosive device (IED) daplin sa kalsada duol sa public market sa Brgy. Kalawag 3 sa nahisgutang lungsod.
Sumala pa nga usa ka seksing babaye nga sakay og motorsiklo ang nakit-an sa footage sa closed-circuit television (CCTV) camera nga maoy nagbilin sa bomba.
Giingong grupo ni Shiek Esmail Abdulmalik alyas Kumander Abu Toraife sa BIFF-ISIS Inspired Group ang gitudlong responsable sa maong pagpamomba. (Edgar E. Fuerzas)