GCTA. Daghan ang naapektohan sa pag-abuso sa pipila ka tawo sa Bureau of Corrections (BuCor) sa Good Conduct Time Allowance (GCTA) Law, ang balaod nga naghatag og kahigayonan sa mga kumbiktado nga makagawas og sayo sa prisohan nga di pa mahuman ang ilang sentensya tungod kay nagbinuotan sulod sa prishohan.
Apan ang naapektohan og maayo mao ang mga ginikanan sa mga biktima sa mga niluog nga krimen sama sa paglugos og patay sa Chiong sisters ug ni Aileen Sarmenta uban sa iyang higala nga lalake diin ang mga kriminal nakumbikto sa kaso nga ilang giatubang ug napahamatangan og life sentence tungod kay wa na may death penalty.
Kining balaod nga GCTA, nga nag-amendar sa orihinal nga probisyon sa Revised Penal Code sa “allowance for good conduct”, maoy hinungdan sa pag-abuso sa mga korap nga opisyal sulod sa BuCor. Mao ni usa sa mga problema sa atong mga balaod nga wala untay problema apan usbon aron kunohay dunay nabuhat ang magbabalaod sa kongreso apan ang resulta di maayo.
Kaniadto ang paghatag sa “good conduct allowance” sa mga kumbiktado nga gibasi pa sa Revised Penal Code wa tay nadunggan nga bolilyaso kon storya sa pangurakot. Kon duna man, posible nga dili mga high profile nga kaso ang nahatagan sa “good conduct allowance” mao nga wala makontrobersyal.
Ang gibalikas karon sa hilom sa mga nakagawas na tungod sa GCTA kay nareporma na sila mao si kanhi Calauan Mayor Antonio Sanchez, nga nakumbikto sa kaso nga paglugos ug patay ni Sarmenta ug iyang kauban. Tungod sa aplikasyon ni Sanchez, nga nabuko tungod sa reklamo sa ginikanan ni Sarmento, ang kadtong nakagawas sa husto nga higayon luoy kaayo karon.
Sa balita sa Sunstar Cebu kagahapon, 65 na ka mga kumbiktado nga nakagawas tungod sa GCTA ang misurender sa kapulisan. Ang kadaghanan ani nila nakumbikto sa heinous crimes. Matud pa, gikan niadtong Octubre 10, 2018, 2,159 na ka mga kumbiktado sa heinous crimes ang gipagawas. Ang 445 ani nabuhian sa panahon sa administrasyon ni kanhi Pres. Noynoy Aquino ug 1,714 sa karon nga administrasyon.
Sa lista nga gipagawas nga 1,714 sa administrasyon ni Presidente Duterte, ang 748 kumbiktado sa murder, 145 pagpanglugos, 156 illegal drugs, 32 kidnapping, 23 parricide, unom sa arson, duha bribery ug duha sa lain nga heinous crimes.
Tungod sa mando ug bahad ni Presidente Duterte, si Virgilio Batuan, 70, kanhi PC, usa sa mga nakagawas tungod sa GCTA, misurender na sa Consolacion Police. Ang lain nga kanhi sundawo nga misurender mao si Jesus Ranoco Negro, Jr., 50, nga nakumbikto sa pagpusil-patay sa nagbugal-bugal kaniya.
Maayo ang katuyoan GCTA law, apan giabusahan lang sa mga korap nga opisyales sa BuCor. Ang duha ka importante nga katuyoan sa balaod mao ang pagminus sa piniriso sa mga prisohan nga nagsugwak na ug paghatag higayon sa mga kumbiktado nga nareporma na nga mahibalik sa ilang pamilya ingon man sa komunidad.
Puslan man nga gi-abusahan ang GCTA Law maayo pa nga wagtangon na lang ni unya ibalik ang probisyon sa Revised Penal Code.
Kon duna may ipuno sa kongreso mao ang pagtabon sa hugaka nga bahin sa balaod nga makit-an karon sa nagpadayon nga senate inquiry.