NIAY mga estorya kabahin sa lesbian, gay, bisexual and transgender (LGBT) nga angayan panaminan sa uban. Kinsa ang nakaila ninyo ni Tonette Macho, kadtong bayot sa Iskul-Bukol show nila ni Tito, Vic and Joey sa Channel 13 niadtong dekada 80? Si Tonette Macho dakong tawo apan bayot. Niladlad gyud. Apan karon si Tonette Macho nahimo nang tunay nga lalaki.
Siya mao na si Anthony Roquel. Mibalik na siya sa iyang orihinal nga pagkatawo human matod pa niya nga misulod kaniya ang espirito santo. Sa interview sa usa ka TV show, gibutyag ni Roquel nga adunay usa ka insidente sa iyang kinabuhi nga nakapabuka sa iyang mga mata hinungdan nga mibalik siya sa iyang orihinal nga pagkatawo. Taas kaayo ang iyang estorya sa kinabuhi ingon man ang iyang pagpakigbatok sa tentasyon. Apan iya kining napakigbatukan.
Usa na siya karon ka Born Again Christian sa pagkakaron. Si Jake Zyrus nga naila kaniadto nga si Charice Pempengco, usa ka inila nga singer, mibutyag nga bisan pa man sa iyang pagkalakin-on apan adto gihapon siya mogamit sa comfort room sa mga babaye. Kay matod pa niya kay orihinal man siya nga babaye. Matod pa niya nga nganong mamugos man ning uban nga mga transgender ug trans man nga adunay ilang kaugalingon nga CR.
Ambot lang kaha si Aiza Seguerra ug pareho ba og baruganan ni Jake. Matod pa Jake nga puwerting daghana sa mga problema karon sa nasud nga angayan hatagan pagtagad sa atong mga magbalaod apan na-sentro naman hinuon ang discussion ning maong walay ayo nga isyu.
Aw, suwerte kining atong LGBT community dinhi sa Pilipinas kay adunay kagawasan ug misagop kita sa paagi sa demokrasya nga sistema. Didto sa ubang nga nasud sama sa mga Islam countries gihimong illegal ang homesexuality.
Gani karong bag-o duha ka mga homosexual ang gibitay didto sa Iran gumikan kay nasakpan nga nakighilawas sa parehong lalaki. Dinhi sa ato mo-demand pa ang maong sektor og espisyal nga tratamento ug kon dili hatagan mosinggit og diskriminasyon. (bobbygnalzaro@gmail.com)