GITATAW sa kanhi Gilas Pilipinas coach Tab Baldwin nga kon hangyuon siya, andam siyang motabang kutob sa iyang makaya alang sa kaayuhan sa national basketball team sa nasod.
Human sa mangil-ad nga kampanya sa Gilas Pilipinas sa 2019 FIBA Basketball World Cup sa China diin nabutlog ang team sulod sa lima ka mga duwa, adunay mga ningpadayag nga angayang ibalik si Baldwin sa programa sa Gilas Pilipinas.
Gipasabot ni Baldwin nga nasayod si Samahang Basketbol ng Pilipinas (SBP) chairman emeritus Manny V. Pangilinan kabahin sa iyang sinseridad kon hisgutan ang basketball sa Pilipinas.
“I’m prepared, and MVP [SBP chairman emeritus Manny V. Pangilinan] knows this, to put my shoulder to the mill and do whatever I can to help,” matod niya.
Taas na sab gyud og kasinatian si Baldwin sa international basketball gumikan kay nahimo kining headcoach sa Malaysia, New Zealand, Lebanon ug Jordan una kini naabot sa Pilipinas.
Apan alang sa American-Kiwi coach, ang paghulip sa headcoach sa Gilas Pilipinas dili maoy solusyon sa problema.
“The coach can’t solve the problem, changing the players can’t solve problems, or just developing a program and not looking at anything else can’t solve the problem,” pasabot ni Baldwin sa interbyu sa www.abs-cbnnews.com.
Giklaro ni Baldwin nga daghang kausaban ang angayang buhaton aron mapalambo ang kapasidad sa national team.
Hinuon giangkon ni Baldwin nga bisan unsaon pa’g bali-bali, wala’y dag-anan ang Pinoyng mga basketbolista batok sa mga higante sa Amerika ug Europe.
Apan alang kaniya, mas makakombati ang Philippine national team kon makasubay lang kini sa saktong programa ug preparasyon. (ESL)