SO, MOULI ang Gilas Pilipinas sa nasod nga manglipaghong. Walay daog sa lima ka duwa sa 2019 World Cup sa China nga ikapresentar ngadto sa atong nasod.
Ug nahanaw na usab ang kahigayonan nga makaduwa og balik sa Olympics nga ipahigayon sunod tuig sa Tokyo, Japan.
Laing posibling mahitabo sa Pilipinas, mao nga molandig kita sa katapusang luna sa 32 ka nasod nga mi-qualify sa World Cup sa China.
Gawas lang sa usa ka duwa, ang Pilipinas pulos gipanglubong sa ilang mga kontra.
Sa unang adlaw, gilihi-an sila og 108-62 nga pagkaparot batok sa Italy; gisamutan og lampurnas sa Serbia sa sunod nilang tahas, 126-67.
Hapit gyud unta makabawi ug modaog batok sa Angola, apan gilupig kini sa lahutay sa overtime ug nasugamak sa 81-84 nga pagkapukan.
Ang wala nato damha mao ang dakong kapildihan sa Gilas ngadto sa Tsunisia,86-67. Kini tungod kay base sa ranking, kining Tsunisia anaa sa ika-51 nga luna, samtang ang Pilipinas, sa pagkakaron, ika-31. Ang Angola, ika-39, Italy ika-13, Serbia ika-upat.
Sa katapusang misyon sa Gilas, gilubong usab sila og 20 puntos sa Iran, 95-75. Ang Iran anaa sa ika-27 nga puwesto.
Sa 0-5 nga baraha, ang Pilipinas misurender og -147 puntos nga sumada sa tanan nilang kapildihan nga nagbutang kanilasa pinakaiwit nga sitwasyon.
Ang Japan (-115) ug Jordan (-132), maoy laing teams sa Asia nga anaa sa ubos nga bahin, apan hangtod ning pagsuwat aduna pa silay usa ka duwa nga nahabilin. Kon pulos mohagdaw og kadaugan, siguro na nga ang Pilipinas mangiwit.
Basi sa atong gisaysay sa unahan, usa ra gyud ang atong masihag kon nganong nagkayamukat ang Gilas. Halos tanan nagkahiusa nga ang rason dili tungod sa coach kon dili - ang kakuwang sa preparasyon.
Walay maayong coach nga makagarantiya og kadaugan kon ang team nga makigsangka batok sa mga lig-ong team sa ubang nasod, nahulma lang sulod sa duha ka semana.
Kini tungod kay nagpaabot pa nga mahuman ang finals series sa PBA Governor’s Cup tali sa San Miguel Beer ug TNT Katropa.
Mosugod ang Fiba World Cup Agusto 31. Nahuman ang PBA Governor’s Cup Agusto 16. Sa ato pa, exactly two weeks lang ang ilang preparasyon, unya kadaghanan sa milangkob sa team mga first timer sa Gilas.
Resulta? Si coach Yeng Guiao maoy nahan-okan sa tanan.
Sa gikaingon ko na sa unahan, kinsa mang maayong laking coach nga anaa sa sitwasyon ni Guiao ang makapakita og maayong performance batok sa mga higanting team nga sakto sa preparasyon?
Sa dihang si Guiao mihulip ni kanhi Gilas coach Chot Reyes, sa niaging tuig, gi-pressume na nato nga all-out ang suporta sa PBA.
Gani gihatagan gilayon og kahigayonan si Guiao sa pagkuha og bisan kinsang star player sa matag team nga iyang magustoan.
Pero diha ra diay kutob kay prayoridad ra man diay gihapon ka di man buhian sa mga teams ang ilang mga players samtang nagpadayon pa ang conference sa PBA.
Dili bag-o kining problemaha. Kaniadto pa kini ug gani dunay mga sugyot nga i-adjust ang schedules sa mga conference sa PBA aron dili maigo sa Fiba World Cup ug mahatagan og igong panahon nga maka-ensayo og sakto ang Gilas.
Kaluoy sa Diyos, anaa na tay solusyon, ang problema lang dili sila ganahan mo-implement niini kay mas gihatagan nila og gibug-aton o prayoridad ang ilang mga duwa sa PBA kay sa dungog sa kinatibuk-ang nasod.
Kini maoy reyalidad. (jun.migallen22@gmail.com)