Langyaw nga boxing judge gipetisyonan

NINGPASAKA og petisyon ang Professional Boxing Officials of Central Visayas (PBOCV) ngadto sa Games and Amusement Board (GAB) batok sa usa ka langyaw nga nagtrabaho isip usa ka boxing judge dinhi sa nasod.

Ang petisyon sa PBOCV gipahinungod ngadto kang Carlos Costa, usa ka Panamanian citizen nga nagpuyo sa Brgy. Mabolo, Cebu City.

Si Costa usa ka boxing writer sa tulo ka boxing websites sa wala pa kini nahimong boxing judge. Sa petisyon sa PBOCV, ilang gisaysay ang daghang mga binuhatan ni Costa nga alang kanila dili maayo hinungdan nga nihimo na sila og lakang batok niini.

Moabot ngadto sa 16 ka mga sakop sa PBOCV ang ningpirma sa petisyon nga gipasaka sa grupo niadtong Septiyembre 6, 2019.

Lakip sa gireklamo sa PBOCV mao ang pagtrabaho ni Costa sa nasod bisan wala kini working visa gikan sa Bureau of Immigration ug Alien Employment Permit gikan sa Department of Labor and Employment.

Ang nangahisgutang mga dokumento pulos gikinahanglan aron makatrabaho ang usa ka langyaw dinhi sa nasod.

Sa kasamtangan, naka-officiate na og 150 ka mga away si Costa sukad siya nahimong boxing judge niadtong Abril sa miaging tuig, kadaghanan niini gipahigayon sa Pilipinas.

Gireklamo PBOCV nga migamit og mga pamaagi si Costa aron madani ang boxing promoters nga kuhaon siyang judge sa mga promosyon niini.

Matod pa sa PBOCV, pahibaw-on ni Costa ang boxing promoters nga siya na ang moabaga sa iyang galastuhan sa plite ug pagpuyo, butang nga dili kabalibaran sa mga promoter.

Gipabuhagay sa PBOCV nga nakasupak kini sa code of conduct sa boxing judges.

Giyagyag sab sa PBOCV nga adunay higayon nga ningtrabaho si Costa isip cornerman ug translator atol sa usa ka promosyon.

Lain kining esena diin gisupak ni Costa ang code of conduct sa boxing judges.

Ubay-ubay pa nga mga binuhatan ni Costa ang gireklamo sa PBOCV hinungdan nga tinguha sa grupo nga matangtangan og lisensya si Costa isip boxing judge.

Ning puntoha, wala pa’y tubag ang GAB kabahin sa petisyon sa PBOCV.

Gisuwayan ning mantalaan pagkuha ang habig ni Costa pinaagi sa Facebook messenger apan dili kini makontak. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph