BISAN og holiday kagahapon, Septiyembre 9, padayon ang pagpatuman sa Traffic Enforcement Agency sa dakbayan sa Mandaue (Team) ang pagclamp sa mga sakyanan nga ilegal nga nag-park sa kadalanan sa syudad.
Muabot sa 51 ka mga sakyanan na ang naclamp sa Team sukad Septiyembre 1, 2019. Sagad niini mga sports utility vehicle (SUV) kang kinsang mga driver nagpataka lang og park sa kadalanan.
Matod sa pangu sa Team, Florentino Nimor, ubay-ubay gihapon ang mga drivers nga gahi og ulo gumikan sa ilegal nga pag parking nga makamugna na og kahuot sa trapik.
Bisan og holiday, subsob gihapon ang pagpatuman sa Team sa traffic ug road safety ordinance sa Mandaue.
Kagahapon, Septiyembre 9, Osmeña Day, usa ka non-working holiday sa tibuok Sugbo alang sa pagsaulog sa adlaw natawhan sa Sugbuanong presidente nga si Sergio Osmeña.
“Yes kay violation sa traffic wala man muila og holiday, padayon gihapon ta but ang bayad sa penalty mihangyo ta nga maka-issue gihapon sila ug resibo despite sa holiday naa tay personnel nga gi-assign gikan sa treasurer’s office,” matod ni Nimor.
Samtang padayon usab ang pagsusi karon sa Team sa mga kadalanan nga mamahimong mapangitaan og paagi nga malutsan sa mga sakyanan aron mamenosan ang huot nga sitwasyon sa trapiko.
Gilaraw karon sa Team ang pakighinabi usab sa mga kawani sa Traffic Department sa lungsod sa Consolacion alang sa pagahimuon niini nga mga plano ug rota aron mamenosan ang traffic sa lugar.
Matod sa operations head sa Team, Mario Gacko, matag weekend, walay traffic enforcer nga modumal sa kadalanan.
Gawas niini, dugang training sa personnel ang gihangyo sa Team. (ANV)