NABALHOG sa Labangon Police Station ang usa ka ex-convict human niya lugosa ang iyang manghod nga babaye sulod sa kuwarto sa ilang balay sa Barangay Buhisan, siyudad sa Sugbo.
Ang biktima nga gitago sa ngalan nga Lovely, 26, personal nga nireklamo sa Labangon police niadtong Dominggo sa gabii, Septiyembre 8, aron isumbong ang gihimo sa iyang maguwang nga gitago sa ngalan nga Ben, 27.
Matod ni Lovely nga samtang natulog siya, kalit nisulod si Ben ug gihuboan dayon siya sa iyang underwear.
Bisan sa iyang hangyo nga dili siya hilabtan niini wala siya panumbalinga ni Ben ug gipanamastamasan siya niini.
Human kini niya gibuhat, nibiya si Ben samtang si Lovely dali nga milakaw ug mitaho sa Labangon Police Station.
Matod ni Police Major Henrix Bancoleta, hepe sa Labangon police, nga bag-o lang nakagawas sa bilanggoan si Ben sa kaso sa illegal nga drugas.
Sa pamahayag ni Lovely nga sa paggawas sa prisohan sa iyang kuya lahi na kinig tinan-awan kaniya.
Nilusad dayon ang kapulisan og hot pursuit operation nga niresulta sa pagkasikop ni Ben didto sa ilang balay sa usa sa ka sitio sa Buhisan.
Wala na makahimakak si Ben tungod sa positibong pagtudlo sa iyang manghod kaniya nga siya ang nanglugos.
Matod ni Bancoleta, ilang ipaubos sa stress debriefing si Lovely.
Gipahiling usab nila sa pink room si Lovely aron maoy ilang idugang sa ebidensya sa pagpasaka og kasong pagpanglugos.
Ila pud imbestigahon si Ben sa pagtuo nga mibalik kini sa iyang bisyo nga mao ang paggamit sa ilegal nga drugas nunot sa iyang nahimo sa iyang manghod.
Tungod sa hitabo, gibasolan ni Ben ang iyang nahimo sa iyang kaugalingong manghod apan wala na siyay mahimo pa ug atubangon na lang matod pa ang silot nga ipahamtang kaniya. (AYB)