SUPERBALITA CEBU

Mga mitahang kombiktado pangdad-on sa Abuyog

NANAWAGAN. Si Virgilio Batulan, 70, nanawagan sa iyang duha ka mga anak nga giingong naa pa sa Cebu, sa pagduaw kaniya samtang naa pa siya sa buhatan sa Criminal Investigation and Detection Grouop (CIDG) 7 sa Camp Sotero Cabahug sa Dakbayan sa Sugbo kay basin di na sila magkita. Gagmay pa ang iyang mga anak dihang siya gikombikto sa pagpatay sa iyang mga silingan niadtong 1990. (Arnold Y. Bustamante)

NIMANDO ang kasamtangan nga director sa Bureau of Corrections (BuCor) Assistant Secretary Melvin Ramon Buenafe nga ihatod sa labing duol nga penal farm nga gipadagan sa ilang ahensya ang mga ex-convict nga ningtahan human gi recall ni President Rodrigo Duterte ang ilang order.

Ang mao nga kanhi mga binilanggo nakapahimus sa Good Conduct Time Allowance (GCTA) law nga nahimong kontrobersyal kay bisan mga gikombikto sa linuog nga mga krimen giapil sa pagpagawas.

Lakip sa nabuhian mao ang tulo sa pito ka mga kombiktado sa pagdagit, paglugos ug pagpatay sa magsuong Jacqueline ug Marijoy Chiong.

Duha sa tulo ningtahan sa BuCor sa kaulohan ug gibalhug nag balik sa New Bilibid Prisons (NBP) sa miaging semana.

Nidiretso na sila si Alberto Caño ug Ariel Balansag sa pagtahan sa Bucor sa kaulohan, wa na magpaabot nga mapupos ang tagal sa ilang pagtahan.

Ilang pamilya sa Barangay Panadtaran, San Fernando, Cebu nisulti nga sukad sila nabuhian sa miaging buwan, wa sila mauli dinhi sa Sugbo.

Samtang ang abogado ni Josman Aznar mopadalag suwat kang Duterte ning semanaha, pinaagi sa executive secretary, aron mangayog katin-awan kalabot sa iyang pamahayag nga naghatag sa nakagawas nga kombiktado og 15 ka adlaw sa pagtahan ug kon di, patungan ang ilang ulo og P1 million madakpan man “dead or alive.”

Si Duterte nihatag og 15 ka adlaw nga ultimatum sa 1,914 ka mga piniriso nga nabuhian pinasikad sa GCTA sa pagtahan human mabutyag ang kontrobersyal nga pagbuhi kanila.

Si manlalaban Edgar Gica, abogado ni Aznar, niingon nga naghuna-huna karon sa pagduso og petition for declaratory relief sa Korte Suprema.

Apan aron sila makaduso nagkinahanglan sila og dokumento, nga wa sila niini.

Si Gica niingon nga gusto siya nga moklaro ang Presidente pinaagi sa gisuwat nga mando aron ilang magamit sa pag-file.

“We don’t have signed documents by the president which we can use and submit to the Court so the Court will decide in defining the right of Josman Aznar,” pagpasabot ni Gica sa Sunstar Cebu.

Miabot nag lima

Dinhi sa Cebu, lima na ka kanhi mga piniriso sa NBP ug penal colonies ang ningtahan.

Ang labing uwahi mao ang usa ka 70 anyos nga lalake nga taga Consolacion.

Matod ni Buenafe nga nahinabi sa Superbalita Cebu nga ang Criminal Investigation and Detection Group (CIDG) nga maoy gitahasan nga mangita sa mga naka benepisyo sa GCTA makig-alayon dayon sa Bucor.

Sugyot ni Buenafe nga ang lima dalhon sa Abuyog Penal Farm sa probinsya sa Leyte nga maoy duol nga pasilidad sa Bucor.

“Kanang mo surrender, i-turnover lang sa PNP para coordinate mi para unsaon pag turn-over sa Bucor. Kanang sa Cebu man gud ang regional prison facility ninyo diha katong sa Leyte. So, dalhon yan didto sa Leyte kadtong pinaka duol sa Cebu,” matod ni Buenafe sa interbyu sa Superbalita Cebu.

Aduna pay daghan ang gitakdang mo-surrender matod ni Buenafe, usa na niini si Josman Aznar, kinsa nipadala nag filler ang pamilya niini.

Si Police Major Nino Lope Briones, chief operation sa CIDG 7, nagkanayon nga magpaabot pa sila sa kamandoan sa ilang labaw sa Camp Crame.

Wa pa silay listahan kinsa kadtong mga kombiktado nga nakagawas tungod sa GCTA.

Apan paabuton nila ang 15 ka adlaw nga tagal ni Presidente Rodrigo Duterte una pa sila molusad og manhunt operation kon di pa sila mo- surrender.

Mangita

Gihatagan lang una og pipila ka adlaw sa CIDG 7 ang mga kombiktido nga maka enjoy uban sa ilang pamilya una sila mo report sa labing duol nga police station.

Adunay giumol nga tracker team ang CIDG 7 nga mao unyay mangita sa mga binilanggo kon magdumili sila sa pag-surrender.

“Yes, we have tracker team already. May mino-monitor na rin tayong mga high value target na pinakawalan dito. But still we’re hoping for the fifteen-day period bago mag lapse ay lahat ng ito specially sa mga Cebuano. Lahat for region 7 for that matter, mas maigi mag surrender nalang sila kaysa sa maging subject sila sa manhunt operation,” matod ni Briones.

Human sa 15 ka adlaw nga tagal sa Presidente, matod ni Briones, adunay himuon nga lapad nga hot pursuit uban ang kapulisan sa Central Visayas ug armadong kusog sa Pilipinas.

Ikalima

Ang katapusan nga nitahan sa Consolacion Police Station nga si Virgilio Batulan ni-surrender tungod sa kabalaka sa pamahayag ni Duterte.

Nakagawas siya niadtong Oktubre 2018 apan hangtod karon wa pa siya makakita sa iyang tulo ka mga anak.

Matod niya nga dihang siya napriso niadtong Pebrero 1990 sa duha ka mga kasong murder ug usa ka frustrated murder human niya mapatay ang iyang mga silingan, gagmay pa ang iyang mga anak.

Ang kamaguwangan nag edad pag 5 anyos samtang ang mga manghod 3 ug 2 anyos.

Wa na siya nibutyag pa kon hain na ang iyang asawa.

Tungod niini, nanawagan siya sa iyang mga anak nga samtang wa pa siya da-a sa Abuyog Penal Farm magkita-kita silang amahan ug mga anak.

“Manawagan lang ko sa akong duha ka anak nga naa ra man daw ni sila diri sa Cebu, nga aria ko ninyo sa CIDG 7 samtang wala pa ko dalha sa Leyte kay basin katapusan na nato ning kita. Tigulang na ko. Wala ko kahibawo sa mosunod nga mga adlaw kon mabuhi pa ba ko,” matod ni Batulan.

Sukad siya nakauli sa Consolacion, si Batulan nagtanom-tanom nalang og utanon sa ilang balay sa Barangay Tayud.

Niawhag siya kang Duterte nga i consider ang iyang edad ug record sulod sa NBP, diin bisan kausa wa siya makasala. (dugang taho ni JJL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph