SUBLING pahimangno ngadto sa mga driver, labina sa two-wheeled nga mga sakyanan, nga bisan sa kaadlawon ug mingaw ang dalan, gikinahanglan ang tumang pagmatngon sa pagmaneho aron paglikay sa makamatay nga mga disgrasya.
Kutob sa mahimo, likayan ang pag counterflow nga usa sa mga common nga hinungdan sa aksidente.
Human nga duha na usab ka mga tawo ang ngamatay ug usa ang anaa sa taladugon nga kahimtang tungod sa panagbangga sa duha ka mga motorsiklo sa lungsod sa Minglanilla, usa niini mi-counterflow.
Nahitabo kini sa Barangay Tunghaan, sa maong lungsod, ala 1:50, Lunes sa kaadlawon, Septiyembre 9.
Giila ang mga nakalas sa disgrasya nga sila si Lester Claro Juban, 22, taga Barangay Tabunok, Siyudad sa Talisay; ug Christopher Delos Santos, 30 taga lungsod sa Alcoy.
Si John Paul Parado, 22, taga Barangay Lagtang, Dakbayan sa Talisay anaa pa sa tambalanan ug kritikal ang kahimtang.
Matod ni Police Master Sergeant Junyl Ater, desk officer sa Minglanilla Police Station, nga ang duha ka mga motorsiklo, nagka-head on collision, samtang parehong kusog ang pagpadagan sa duha ka mga driver.
Si Juban maoy nagmaneho sa Yamaha Sniper ug nga angkas niini si Parado, kinsa paingon sa amihanang bahin.
Si Santos kinsa gikan sa Siyudad sa Sugbo nagmaneho sa motorsiklo nga Skygo nga paingon sa habagatan sa probinsya sa Sugbo.
Gitug-an ni Ater nga si Juban nisuway unta sa pag overtake sa nag-una kaniya nga sakyanan pinaagi sa pag-counterflow, apan nakatagbo ang motorsiklo nga gimaneho ni Santos nga nagsubay sa hustong lane.
Mga biktima parehong nangalagpot gikan sa gisakyang motorsiklo, pipila ka metro ang gilay-on diha sa dan.
Gidali sa pagdala sa tambalanan ang mga biktima, apan sila si Juban ug Santos ang parehong gideklarar nga dead on arrival.
Tungod sa bato
Samtang magtiayong nagmotorsiklo naangol human maligid sa tunga sa S. Osmeña Road, Cebu City tungod sa ilang naligsan nga dakong bato.
Mga medical personnel sa Cebu City ug Philippine National Red Cross daling ningtabang kanila ni Joseph, 39; ug Mary Grace Marinay, 41, taga Barangay Manduwang, Minglanilla.
Ang magtiayon nakaangkon og bun-og sa kalawasan.
Si Mary Grace nawagtangan sa pipila ka mga ngipon human maumod sa karsada.
Ang magtiayon paingon unta sa Lapu-Lapu City.
Wala nila mabantayi ang bato nga anaa sa tunga sa dalan. Pagkaigo nila sa bato, nalagpot sila.