UNOM ang nadakpan nga nagkupot og shabu ug marijuana sa gihimong pagpangronda sa mga sakop sa kapulisan sa lungsod sa Minglanilla, Cebu pasado alas 3 Lunes sa hapon, Septiyembre 9, 2019.
Ang buybust operation sa Sitio Upper Calajoan, Barangay Calajoan gidumala sa Provincial Intelligence Branch (PIB) ug Provincial Drug Enforcement Unit (PDEU) sa Cebu Police Provincial Office (CPPO) pinangulohan ni PLt. Col. Marlu Conag, hepe sa PIB.
Giila ni Conag ang mga dinakpan nga sila Lito "Toper" Labajo, 34, taga Barangay Dumlog sa Talisay City; ug Ian Cedrick Fernan, 26, taga Barangay Poblacion, Talisay City.
Si Labajo maoy target sa buybust, samtang si Fernan giila sa kapulisan nga usa ka high value target.
Samtang lain pang upat nga nangadakpan nga sila Judy Del Rosario, 38, ug Cleven Jedd Bracamonte, 28, mga taga Talisay; Melvin Matubay, 28, taga Barangay Abucay, Balamban; ug Jean Claudette Las Piñas, 32.
Sa gihimong ronda nasakmit sa mga operatiba ang mga pakete sa shabu nga moabot na sa P166,000base sa iyang Dangerous Drugs Board (DDB) value.
Samtang moabot sa kapin sa P18,000 ang kantidad sa marijuana sticks ang nasakmit sulod sa balay.
Matod ni Conag, ang pagkadakop sa ilang target ug lain pang lima natuman human sa gihimong pagpang ronda sa milabay nga mga adlaw sa Barangay Dumlog, Talisay City.
Usa sa ilang dinakpan gitudlo si Labajo nga maoy ilang ginakuhaan.
Matod ni Conag, si Labajo ug Fernan giila nila nga high value target tungod sa kalapad sa pamaligya niini.
Matod ni Conag, nibalhin si Labajo og pwesto sa pagtuo nga dili kini mahibaloan. Apan nabulabog gihapon ang iyang ilegal nga kalihukan human sa pagkadakop sa usa sa mga suki ni Labajo.
Ang nag-inusarang babae nga dinakpan maoy suguon ni Labajo nga mokuha ug magpadala og kwarta sa mga suki ni Labajo.
Ang mga dinakpan kasamtangan unang gipriso sa CPPO sa Barangay Sudlon Lahug, Cebu City. (Benjie B. Talisic)