LIBRE na ang emergency number nga 911 sa siyudad sa Cagayan de Oro diin 24 oras nga moresponde sa bisan unsa nga mga emerhensya.
Gigahinan kini og P40,000 matag bulan aron nga mapahimuslan sa katawhan ilabi alang sa dinaliang pagresponde.
Sa pakighinabi kang Nick Jabagat, ulo sa City Risk Reduction Management Office (CDRRMO) sa siyudad sa Cagayan de Oro, gibutyag niini nga angay kining pahimuslan sa katawhan.
Sukwahi kaniadto nga kinahanglan pa og load. Karon, libre na kini nga magamit bisan og zero balance karong panahona.
"Libre na. Okay na ang 911. Kay ang ilang experience before, kinahanglan pa man og load gud. Only globe and TM. Dako kaayo ni nga project. Sayang og di magamit," matud ni Jabagat.
Nagpasalamat usab kini sa mga network nga niabag usab niini nga programa.
Nagpahinumdom usab kini sa katawhan nga dili magbinuang tungod kay naka-rekord ang tanang tawag ug posibleng ma-block ang numero sa magbinuang.
Gawas niana, daghan usab nga kadaot ang mahitabo niining prank calls sama sa dili na marespondehan ang tinuod nga nanginahanglan og tabang.
Padalhan usab og warning ang nag-prank calls, ug kung magbinuang pa kini pag-usab dili na kini makatawag sa 911.
Kinahanglan lang usab nga modangop sa ilang buhatan ug pamatud-an nga wala kini nagbinuang o dili kini ang gagamit aron nga mabuksan pag balik ang maong numero.
Sa pagsulat niini nga balita, usa pa ka prank call ang nadawatan sa maong buhatan nga nagpatabang og sunog. Ug pagresponde, walay bisag lapog nga naabtan sa Bureau of Fire Protection ug sa CDRRMO.
Kasamtangang anaa karon sa upat ka mga tigdawat og tawag diin duha niini ang sa smart ug duha pud ang sa globe.