GISUTA pa sa kapulisan ang anggulo sa pagpatay sa usa ka negosyante ug pinanser sa swertres 3:00 sa kaadlawon sa Lunes, Setiyembre 9, sa Phase-2, NHA, Barangay Kauswagan, Cagayan de Oro.
Lima ka mga samad pinusilan ang naangkon ni Rolly Maestrado, 47, minyo, residente sa maong dapit.
Sa pakighinabi kang Police Staff Sergeant Hernan Abalde, imbestigador sa Police Station 4 (PS4) sa Carmen, gikabutyag nga nakita nalang ang patay nga lawas ni Maestrado nga nagbuy-od ilalom sa L300 van nga nakaparada sa dapit.
"Ang biktima nakaangkon og lima ka samad sa lain-laing parte sa lawas. Di pa nato ma-confirm kung business pa gyud. Kana di pa pud nato ma istorya kung usa ka financier sa swertres," matud ni Abalde.
Gidugang pa nga wala pa kini silay nakitang anggulo o motibo sa maong krimen ug palawman pa ang imbestigasiyon.
"Sa pagkakaron, blangko pa ta karon. Kay wala pa man tay makita karon. Ato pang balikan ang area," matud ni Abalde.
Narekober ang unom ka mga fire cartridge ug na-deformed nga bala gamit ang 9mm nga armas.
Samtang nakurat na lang ang asawa sa dihang nakamata mga alas 4:00 sa buntag wala ang iyang bana, ug wala kini nasayod kung unsang orasa nigawas. Nagtuo kini nga kaila ra sa biktima ang suspetsado, apan nibutyag nga wala kini nadawatang mga hulga.
Nibutyag usab kini nga pinanser sa swertres ang iyang bana sukad pa tuig 2004.
Giingong nakadungog lang ang mga residente og buto-buto sa armas apan walay nakasaksi sa panghitabo.
Ang patay nga lawas ang gidala na sa Bollozos Funeral Homes sa Bulua.