SILA si Zachary Lorenzo Sulit ug Chad Tancontian niangkon og mga titulo sa ilang tagsa-tagsa ka dibisyon sa bag-o lang natapos nga Datba Youth Mini Tournament didto sa SM Lanang Premier Bowling Center.
Si Sulit, dunay handicap nga 35, nipaligid og kinatibuk-ang 658 pins human sa upat ka mga duwa sa junior category. Iyang gipukan sila si Clark Tancontian (35) ug Marion Bermudez (40) kinsa nahiluna sa ikaduha ug ikatulong puwesto sa maong han-ay.
Si Clark Tancontian niigo og 532 pinfalls samtang si Bermudez niiskor og 658.
Si Chad Tancontian (35), sa pikas bahin, nipaburak og kinatibuk-ang 654 pinfalls sa upat ka mga duwa aron nga mohari sa youth division.
Si Keith Palces (35) nisungkit sa runner-up nga dungog pinaagi sa pag-igo 616 pinfalls samtang si John Mark Sia (21) nisunod sa ikatulo uban sa 590.
Mga mananaug nakadawat og medalya gikan sa tigpasiugda nga Tenpin Bowlers Association (Datba).