SAMTANG kadaghanan kanato ang okupado sa paghisgot sa kontrobersya sa Bureau of Corrections, daghan sa akong mga paryente ang nityabaw tungod kay wala naatiman silang mga mag-uuma.
Partikular ang mga kabanay nga nagsalig sa halin sa ilang lubi sanglit halos pangayuon nalang kini sa mga negusyante.
Gani, wa na gikopras sa akong inahan ang iyang pipila ka punoan nga lubi sa among probinsya sa Davao del Sur tungod kay barato ang presyo.
Suma pa niya, kung iyang koprason, mas dako pa siya og gasto kaysa halin sa iyang kopras. Mao nga pait among kahimtang karon kung ikompara kaniadto.
Sa mga komento sa netizens sa Facebook, nabasa nako nga grabe ang kalisud karon sa mga mag-uuma tungod kay daw napasagdan kini sa hintungdan nga ahensya sa gobyerno.
Hinuon, duna may gihimo ang gobyerno sama na lang sa trading agreement tali Pangulong Rodrigo Duterte ug Chinese President Xi Jinping atol sa Belt and Road Forum niadtong Abril ning tuiga.
Kini nagbunga human ang Pilipinas nakahimo sa unang shipment sa mga lubi ngadto sa China.
Sa akong nahinumdoman, ang rehiyonal nga buhatan sa Department of Agriculture (DA) Davao Region nagbutyag nga usa ka Davao-based company Eng Seng Food Products nagsugod na sa pag-eksport og tone-toneladang lubi sa siyudad sa Guanzhou ug Xiamen sa China niadtong miaging bulan.
Ang opisyal sa Eng Seng Food Products nagkanayon nga bisan sa dakong panginahanglan sa lubi didto sa China, ila gihapon nga limitahan pag-eksport og lubi subay sa protocol sa gobyerno sa China.
Ang DA nipasalig nga motabang sa pagkalap og igong suplay sa lugi pinaagi sa mga lokal nga prodyuser dinhi sa isla sa Mindanao.
Kung ugaling naa na kining mga kompanya nga nag-eksport og lubi sa China, hinaut nga di pasagdan sa gobyerno nga halos pangayuon nila ang presyo sa lubi aron di mapasmo ang atong mga mag-uuma.
Di lang usab sila kutob sa pagpangita og kompanya nga mo-eksport og lubi, kundi ilang pakusgan ang paggama sa coconut-based products sama sa coco water, coco coir, coco flour, coco vinegar, ug uban pa.
Makig-alayon usab sa ubang ahensya sa gobyerno aron lantawon ang kaayuhan sa atong mga coconut farmers, apil na rice farmers, ug uban pa tungod kay nagkinahanglan kita og maayong public administration nga pasmuhon ang mga Filipino.