Mga menor de edad did-an na nga modrayb og motorsiklo

MALALAG, Davao del Sur -- Gipakatag na sa kapulisan sa lungsod ang impormasyon alang sa bag-ong balaod nga Republic Act 10666 kun “Act providing for the safety of children aboard motorcycles.”

Mismong si Police Captain Edilberto Cabillo, hepe sa Malalag Municipal Police Station, nipahibawo atol sa flag raising ceremony niadtong Lunes nga apil sa ilang pagadakpon ang mga menor de edad nga magmaneho og motorsiklo.

Sumala ni Cabillo nga mahimong makakuha na og student permit (SP) ang mga nag-edad og 17 anyos ug unom ka bulan kon duol na sa 18-anyos ang edad.

Giklaro niini nga bisan adunay SP di gihapon mahimong makamaneho ang menor kon way kaubang drayber nga naghupot og professional driver’s license.

Nagbahad ang opisyal nga ilang i-impound ang mga motorsiklo nga gimaneho sa mga menor ug ang mga ginikanan na ang manubag ngadto sa Land Transportation Office (LTO).

Gitataw sab sa opisyal nga hugot sab nilang ipatuman ang pagdili sa mga bata nga moangkas sa motor kon di pa makaabot ang tiil niini sa footrest sanglit apil kini sa gipatumang RA 10666.

Ang maong balaod nagtakda og multa sa paglapas niini nga mobalor gikan sa P3,000 alang sa first offense, P5,000 sa second offense, ug P10,000 sa third offense.

Ugaling katulo ka higayon nga makalapas ang maong drayber, mahimo sab nga ma-suspende ang driver’s license niini sud sa usa ka bulan ug sa takna nga makadaghang higayon nang gilapas mahimo sab nga makansela na ang iyang katungod sa pagpamaneho.

Si Cabillo midason nga angayang andam kanunay ang mga dokumento sa tanang drayber aron di malangan sa ilang biyahe panahon sa paglusad og checkpoint. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph