CENTRAL MINDANAO -- Gidakop sa hiniusang puwersa sa militar ug kapulisan ang bise mayor sa Datu Unsay, Maguindanao Province.
Nahitabo ang pagsikop kang Vice Mayor Bai Janine Ameril sa gilusad nga law enforcement operation sa kasundalohan ug kapulisan ug Philippine Drug Enforcement Agency sa Bangsamoro Autonomous Region in Muslim Mindanao (PDEA-Barmm) alas 10 sa buntag, Lunes, Septiyembre 9.
Matud ni PDEA-Barmm director Juvenal Azurin nga target unta sa operasyon si Mike Sittie alyas Kumander Mike nga nag-atubang daghang kaso ug naay warrant of arrest sa korte.
Nasayran nga una nang gironda sa mga awtoridad ang balay ni kanhi Armm assemblyman Sidic Ameril sa Sitio Ameril, Barangay Manggay, Talitay apan nakaipsot ang mga suspek.
Nasayran nga naabtan sa mga awtoridad ang asawa ni Sidic nga si VM Janine sulod sa balay hinungdan nga gisikop.
Narekober sa mga awtoridad gikan sa balay ang mga armas, P200,000 kantidad sa shabu ug mga bala.
Gibalhog na si Janine sa prisohan sa PDEA-Barmm. (Edgar E. Fuerzas)