TIKLO ang usa ka guwardiya kinsa giingong nanulis sa usa ka spa sa J.R Borja Street, Barangay 34, siyudad sa Cagayan de Oro.
Ang suspek naila nga si Romnick Masayon, 26, ulitawo, lumad sa Masipang Rizal, Zamboanga del Norte ug kasamtangang residente sa Barangay Balulang, siyudad sa Cagayan de Oro.
Sa impormasiyon nga nahipos gikan sa Police Station 2 (PS2) sa Cogon, gikabutyag nga si Masayon ang suspetsado sa sunod-sunod nga mga pagpanulis sa maong dapit.
Nasayran usab nga nasikop kini sa follow-up operation human nga gitumbok sa tinugyanan sa patigayon nga kini ang nisulay sa pagpanulis kanila apan pakyas kini human nadunggaban ug nailog ang armas.
Giingong gisulayan pa kini niya og pusil ang suspek apan wala nibuto ang armas. Nagpahigayon usab og follow-up operation ang kapulisan rason sa pagkasikop ni Masayon human positibo kining giila samtang nag-duty diha sa may Agora.
Nakuha gikan sa suspek ang 38 kalibre ug lima ka buhing bala.
Sa pagsulat niini nga balita, ang maong suspetsado ang kasamtangang nagtingkagol na sa mini-cell sa Police Station 2 sa Cogon.