KON chocolate na gani ang hisgutan, di magpauwahi niini ang mga Pinoy.
Gibisita sa #SuperLamiExtra team ang Marcus & Iris Chocolate Store, bag-ong nangabli nga tindahan og chocolate sa may P. Gomez St., Brgy. Centro, Mandaue City.
Barato ang mga baligya sa Marcus & Iris Chocolate Store.
Opisyal silang open for business niadtong Agusto 30, 2019.
Ang presyo sa ilang chocolate nagsugod sa P2.
Matod ni John Mark Gentiles, usa sa mga tag-iya, abot-kaya ang presyo tungod kay direkta man nilang gikuha ang ilang stocks sa ilang lokal ug international suppliers diri sa Cebu, Manila ug Malaysia.
“We’re also looking for another product or item nga pwede namo mabutang ani nga cheaper pa sa P2,” ni Gentiles sa dihang nahinabi sa Superbalita Cebu.
Matod niya, kun itandi sa mga naila nga grocery stores nga namaligya og chocolates, mogintang ang ilang presyo gikan sa P1 ngadto sa P10.
Kini ang pipila sa mga produkto nga imong mapalit sa Marcus & Iris Chocolate Store: Hershey’s products, Mars chocolates, M&M, Cadbury, Milka, Chips Ahoy, Goya, Toblerone, Twix ug Snickers.
Sa matag karon ug unya, naa silay idugang nga mga produkto.
Daghang kustomer, labi na mga estudyante, ang magsud-gawas sa Marcus & Iris Chocolate Store kay nahimutang man kini duol sa mga eskwelahan.
Gawas sa mga imported o international chocolate products, halin sab ang ilang JN Cacao Chunks nga tag-P99 ilabi na ang with dried mango nga variant, MS3 Chocolates nga gikan sa Davao, ilang Tea Chocolate nga tag-P110, Cacao Tablet nga tag-p165 ug Tablea Butterscotch gikan sa Argao.
Sa mga naghinayhinay na og pamalit pangregalo alang sa Pasko, abli ang Marcus & Iris Chocolate Store 10 a.m. - 8 p.m. Lunes ngadto sa Sabado ug 10 a.m.-3 p.m. matag Dominggo.