SECTIONS
Thursday, September 19, 2019
SUPERBALITA CEBU

Sugilanon: Duha ka tulisan

SULOD sa ilang hideout nga giabangang balay nag-atubangay ang duha ka notadong tulisan nga dugay nang gipangita sa mga tinugyanan sa balaod dinhi sa siyudad sa Sugbo. Sila si Pete ug Romy. Taga siyudad sa Butuan silang duha. Maoy modus nila nga mobalhin-balhin og estar sa usa ka siyudad human sila makabiktima sa pagtulis-patay, nga kalagmitan mabiktima mga negusyante gayud. Dihang duna na silay warrant of arrest sa kapulisan sa Butuan, mibalhin dayon sila sa siyudad sa Davao, dayon sa siyudad sa Cagayan de Oro, hangtod nga napadpad sila dinhi sa siyudad sa Sugbo. Duha na ka negusyanteng Insek ang ilang gitulis ug gipatay dinhi sa siyudad sa Sugbo.

“Uy, ngano gong nagkupot ka anang rosaryohan, Bay Pete?” matod ni Romy nga nahibulong samtang mitutok sa badi-bading tulisan ning udtong tutok sa Biyernes Santo.

“Gusto na kong maghinulsol sa akong mga sala, Bay Romy! Mobiya na ko ning dautan tang binuhatan. Daghan nang kinabuhi ang nakalas sa atong pagpanulis.”

“Hahaha! Karon pa hinuon ka maghinulsol nga ‘wanted dead or alive’ na tang duha sa kapulisan, bisan asang siyudad!” Mikatawa si Romy.

“Karon pa ko makatugkad, Bay Romy! Moabot man gyud ang atong katapusan, mao nga gusto kong mangayog pasaylo sa Ginuo sa atong kasal-anan.”

“Ha-Ha-Ha! Wa na tay luna sa pagpasaylo sa Ginuo, Bay Pete! Tana, mosibat na ta kay naa, miabot na ang mga pulis sa gawas nga modakop nato. Seguradong i-salbids ta nila!” ni Romy nga miibot sa iyang kalibre .45 nga pistola. Dali siyang mikanaog nga didto moagi sa kusina. Milingi siya kang Pete. “Bahala na ka, Bay Pete! Mosibat na ko!”

“Wa na tay kapaingnan, Bay Rom! Maghinulsol na lang gyud ta sa atong mga sala!” ni Pete nga mihulbot sab sa iyang pistola apan padayong nagkupot sa rosaryohan.

Kalit milanog ang mga paka-paka sa mga armas de fuego gikan sa mga pulis sa gawas. Nabati ni Pete ang kusog nga inagulo ni Romy nga naigo sa bala sa kamatayon. Girakrakan ang balay ug nabatyagan ni Pete nga naigo siya. Mihuot ang iyang dughan nga mikamang sa salog nga nagkupot gihapon sa rosaryohan. Mipasunding sa iyang handurawan ang pamayhon ni Ginuong Hesus nga naghanot na nga gilansang sa krus. Mikibot ang baba ni Pete. Daghang dugo miagas sa samad sa iyang tiyan nga naigo sa bala. Naghingutas na siya.

“G-Ginuo, pasayloa ko sa akong mga sala! H-Hinumdomi ako kon tua ka na sa imong gingharian!” Kinasingkasing nga naghinulsol si Pete bisan nag-abot na ang iyang gininhawa.

Ug sa danag niyang kahimatngon nanaginting ang tingog ni Ginuong Hesus nga migahom sa tibuok niyang galamhan. “Karon dayon mahiuban ka kanako sa paraiso!”

Miping-it si Pete. May mihagtos. Ug mikaub siya sa hawanan sa balay. Wala na makamatikod si Pete sa pagsaka sa mga pulis sa balay. Wala na. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph