GRABE gyud ang epekto niining brown-out. Murag mibalik man hinuon kita sa 1990's nga grabe ang power crisis. Kadto sa panahon ni Ramos dayon ang solusyon daw adto kay dugang og planta dayon iyang mga tawo raman diay ang nanag-iya sa mga planta nga gitukod. Paagi raman diay kadto nga ma-justify ang power deal sa mga kompanya. Pastilan kadto nga panahon. Karon na usab grabe ang brown-out. Matud pa sa National Grid Corporation nga ang supply maminus gayud tungod kay ang ilang pundo dili man igo para mosustento sa demand nga power sa tibuok Mindanao.
Kung imong i-analyze ngano nga makulangan man kini, tungod kay daghan ang demand sa gamit niini dayon gamay ra ang supply nila, unsa man ang solusyon nato niini? Dugang Hydro plant? Solar plant? Wind plant? O coal-fire plant?
Laing paagi naba usab kini aron mojustify sa mosulod nga dako nga kompanya para kuno masulbad ang krisis sa kuryente? Unsa man diay ang trabaho sa National Grid nga sila man unta ang mo-identify sa supply ug demand sa kuryente, mga ekspert mana sila niana nga trabaho. Ngano nga dili man nila ma-tumbok kana. Hinumduman nako sa una, kadtong nag-media tour ang Napocor pa kadto nga kahibalo sila sa demand apan depende sa gobyerno ang pagtukod niini. Unsa man diay ang buhat sa Department of Energy? Pastilan, gigago lang man siguro kita ani. Dako naraba kaayo ang bayronon sa kuryente.
Makalingaw kini nga balita tungod kay sa Africa, talagsa ra ang brown-out bisan kulang ang tubig, hinuon dili nato makumpara kay daghan man tag industriya diha dayon minus man diri pero sa mga dagkong syudad sa Africa dili ingon niana ang sitwasyon. Gitumbok nila nga ang El Nino ang hinungdan, kaluoy ba ni El Nino napasanginlan siya, kung makatubag pa si El Nino gibatikos naniya ang mga opisyal nato. Ngano ang mga deserto nga nasud dili man gabrown-out nga wala mana silay El Niño dayon mas dagko ang industriya? Kabalo lang sila unsaon og gamit ug andam sila. Sobraan naman sad kitang Pinoy sa demokrasya mao nga maabuso gayud kini.
Matingala kamo ngano miambak ko sa demokrasya nga suga man hisgutan, daghan kaayo atong balaod apan tungod sa ka lenient nato ug daghan mga ngolngol dili na mabantayan ang ubang isyu. Ayha ra dayon mabantayan kung krisis na. Kining krisis mag last hurrah siguro ni GMA tungod kay hapit na siya mohawa sa pwesto, mga last few deals niya siguro kini ug ang justification kay brown-out. Sapawan gayud sa brown-out ang isyu sa Maguindanao Massacre ug eleksyon ilabina ang C5 contrversy ni Villar. Hay kitang media, kabahin usab sa kaus-us sa atong katilingban ug kalambuan niini. Kada basa nako sa balita puro brown-out ang isyu, nawala na ang ubang mahinungdanon ug angayt tutukan nga balita. Anyway, lainlain man ug thrust gud nato. Kabahin man kini sa demokratikanhong panggobyerno.
Maayong adlaw ug sa sunod semana napud.