PAMPANGA

Garcia: Abagat at Amyam (Southwest Monsoon and Northeast Monsoon)

KAPISIK

"AMPAT ing bengi ning kalabing-adwang mataloto panaun menabu ya,

At ing kataimikan, ing ketasan ning albug king bengi, inakmul da la ring burul,

Ding atlung batala a mibait king yatu, ding Ginung Dakila ning bye,

Linto la karing bunduk.

Ding ilug minagus la karing bitisan da;

Ing ambun ginato karing salu da,

At ding buntuk da minangat la king kemalan babo ning labwad.

At migsalita la, at mengari king marayung duldul

Ding siwala da dinugang karing kapatagan.

Ing Mumunang Batala ngana:

Ing angin lalabul dane ning Paralaya;

Ipildis ke ing lupa ku king Mawli,

Uling ing angin kakasnan na la ring kambang ning arung ku

Karing salingalngal ding bage a mengamate.

Ing Kadwang Batala ngana:

Iti ing salingalngal ning mesilab a laman, mabanglu at masaplala.

Sangaban ku.

Ing Katlung Batala ngana:

Iti ing salingalngal ning kamatayan a lalangi king sarili nang lagablab.

Mabayat iting makayangyang king angin,

At mengari king marok a salingalngal ning inawa ning kulkul

Lalabagan na la ring panamdam ku.

Ibalikid ke ing lupa ku king Pangulung alang bau."

-- Kahlil Gibran, "Atlung Batala"

***

Ing "monsoon" metung yang kabilyan ning panaun a mayangin o masikan ing labul ning angin. Adwa lang "monsoon" deng araranasan tamu keti Pilipinas-ing "abagat" o ing angin a manibat king Mawling Paroba (Southwest) at ing "amyam" o ing angin a manibat king Pangulung Paralaya (Northeast).

Ing "monsoon" kimut ne ning angin a migmula king metung a kabilyan ning panaun, a lalambat mapilang bulan at sasakupan na ing maragul a dake ning yatu.

Abagat: Ing Masikang Labul ning Angin neng Panaun ning Kaleldo.

Iti makikilala ya kapamilatan ning masikan, keraklan keng paroba ya o parobangmawli ya lalabul at ya ing pagmulan ning dakal a bagsak ning uran karing maragul a kapulwan ning Asya at king Mawli at Paralayang Asya. Mabiga ya ing banwa neng abagat.

Bunga iti ning angin a lalabas karing dane ning mapaling dake ning dayat malat, a magpayangat king katas ning pamanyalipapo ning danum manibatan king dayat malat; ing abagat kabang kasna yang ambun, dirimla kabang kikimut yang papunta king pangulu at kabang titas ya babo ning gabun; karas ning penandit a ing ambun a lalangi at maging sangkan ning dakal a uran bang paranuman la ring palayan at ibabad na la ring kagubatan, misan maging sangkan ning albug lele ding kabundukan a gisanan na gubat ning tau.

Ing abagat yang maging kabilyan ning panaun laganas a Asya manibat Abril angga nang Oktubri banwa-banwa.

Amyam: Ing Masikang Labul ning Angin neng Panaun ning Dimla

Ing amyam keraklan mayna ya at, ing paralaya at pangulu-paralayang labul ning angin mas marimla at mas malangi nung yambing king abagat, a maki-mataloto dake ring tuki-tuking aldo alang biga. Manibatan iti king malawak a matas a dimla a matitipun karing dane ning Siberya, Mongolya at pangulung Tsina balang panaun ning dimla king pangulu.

Ing amyam tutulak yang palwal padurut pawanan manibat king libutad na at makilaban ya king abagat kilub ning metung o adwang duminggu, a maralas manibat king Setyembri at bayung Oktubri, bayu na laganasnan ing panaun king marimlang kabilyan king mas marimla at mas malanging abagat karing alus bangsa king Asya angga na king Abril ning tutuking banwa.

Milalako la dakal a gamit deng payung neng panaun ning amyam.

***

Dake Talabaldugan:

1. lábu-labo/lábu-labu - (panguri/panantabe) samut-samut o dakal a mipate-pate. English: free-for-all, fights, competition, battle . Alimbawa king pamangamit: "Abe-abe la pang mamyalung keng arap pisamban nandin kaybat abalitan ku labu-labu no pala."

2. labog/labug - (palagyu) lula, pangalula, pisak, dalumdum, kadalumduman. English: (of eyesight) nearing blindness, eve of blindness, dimming vision. Alimbawa king pamangamit: "Deng taung magsisiti king labug da panakit deng aliwa ilang masumbat king karelang ketasan lub."

3. labog/labug¹ - (palagyu) pangalabug, kalabugan. English: (of liquids) purbidity, obsfuscation . Alimbawa king pamangamit: "E da ne ikwa pa itang menabung sula uli ning labug ning danum keng ilug napun."

4. labog/labug² - (palagyu) pangalabug, kalabugan ning amanu o salita. English: (of language) obscurity of meaning. Alimbawa king pamangamit: "Ing labug ning penyabi na yang kesambut na keng daluman da ning sadya nang kakaluguran a pekipaten na uli namu ning alng mula-mula."

5. labog/labug³ - (palagyu) dulum, dalumdum, lamlam, kulimlim, pamanukup, lulam. English: (of light) dimness, darkness. Alimbawa king pamangamit: "Mamako la dapat di dara ku oneng e na la melaus uli ning labug ning banwa king panibatan da."

***

Gawing mekalingwan karing Kapampangan!

Atatandanan ku pa -- inyang bingut ku pa -- deng tugak sisyak na la kaybat ning kaleldo at neng paratang na ing kauran. Nung paratang naman ing dimla at palako na ing kauran -- deng sisyak naman deng ayup a kandungangu neng bengi at agnan. Makanyan man, kareng adwang panaun a rening misasalisi, deng kuliglig ila ring e mamiling panaun. Kabud bengi na dandaman na lang sisyak. E na antita ngeni. Deng mag-videoke ila na reng darandaman e mu neng bengi nung e angga na lang galingaldo at maralas miraras la pang paugtwan.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan. Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph