UNSA kahay hinungdan nga gipa byahe pa man ang usa ka eroplano sa Cebu Pacific padung sa Dumaguete sa miaging Miyerkoles, Septiyembre 4, 2019 sa may mga alas 5 sa hapon bisan kon dunay mora ug nagkutokuto nga tingog sa tuo nga ligid niini?
Bisan sa pagliko pa niini padung sa runway, diha nay nagtingog sa ligid niini.
Sama sa dunay nag-agik-ik nga tingog gikan sa may tuo nga ligid. Samtang nagka kusog ang dagan sa runway sa maong eroplano, nagka kusog sab ang kuto-kuto nga tingog niini.
Sa akong paminaw, morag dunay nagbag-id nga sama sa puthaw.
Nawala lang ang maong tingog sa dihang milupad na ang eroplano.
Mibalik na sab ang maong tingog sa dihang mitugpa na sab ang maong eroplano sa runway sa Dumaguete Airport.
•••
Sa kadaghan nga higayon nga misakay ako og eroplano, mao pa kadto ang higayon nga nakadungog ako og ingon adto nga tingog.
Lain ang akong paminaw sanglit dili normal ang maong tingog. Gani, nahadlok ako kay basin og unsay mahitabo sa maong eroplano.
Sa kanunay nakong pagpaniid, wala na nako mabantayi kon nakadungog ba ang akong kauban nga mga pasahero sa maong tingog.
Nagtuo ako nga dunay diperensiya ang maong eroplano.
•••
Duna bay higayon nga ipahibalo nako ang akong namatikdan sa mga stewardees?
Wala na kay samtang nag-taxi ang maong eroplano, mipahimutang man sab ang mga stewardees sa ilang mga lingkoranan og mibangan sa ilang kaugalingon sa seat belt o kanang giingon nga “take-off stations.”
Maayo unta og ayohon pag check sa mga tinugyanan sa Cebu Pacific ang maong eroplano kay bason madisgrasya ang maong eroplano.
Dili na angay paaboton pa nato ang disgrasya nga mahitabo tungod kay mahimo man kini buhaton samtang nagpundo ang eroplano sa tarmac.
•••
Samtang naghulat ako nga makanaog sa Oceanjet gikan sa Tagbilaran kagahapon sa buntag, akong nakita nga hinay kaayo ang pagpakanaog sa mga pasahero sa duha ka agianan pagawas.
Siyempre, hinay kay daghan man ang gustong maka-una og gawas. Siyempre hinay kay duha ra man ang agianan unya daghan ang mogawas.
Mao kini ang kasagaran nga tubag kon dunay mangutana.
•••
Walay problema kining maong sitwasyon kon normal lang ang panghitabo.
Apan kon dunay disgrasya sulod sa maong sakyanan sama sa sunog, dunay naghuramentado, dunay nag-away o nagpusil, dunay buto, o bisan unsa na lang nga emergency, unsa may mahitabo sa mga pasahero kon hinay kaayo ang pagpagawas?
Dili ba delikado kaayo kini?
Kon hinay ang pagpagawas sa normal nga pagkanaog, unsa na kaha kon dunay emergency unya mag-inilogay na ang mga pasahero sa pag-gawas?
Dili ba angay nga i-check kini sa mga kadagkoan sa MARINA o kaha sa Philippine Coast Guard?
•••
Kinsay moangkon nga apil siya sa gitawag og “Freedom for Sale” sa Bilibid?
Siyempre, wala.
Apan nagkadaghan ang mga testigos nga misulti nga mibayad sila aron makagawas sa presohan ubos sa Good Conduct Time Allowance (GCTA).
Kinsa may nagsulti sa tinuod, ang mga testigos o ang mga opisyales sa Bilibid?
Kinsay angay nga manubag sa pagpagawas sa mga piniriso ubos sa GCTA?