GIHULAGWAY sa kapulisan nga “drug princess” nakuhaag kapin sa P1 milyon nga balor sa shabu atol sa buy-bust operation sa ala 1 sa Martes sa kaadlawon, Septiyembre 10, sa may Visitacion street, Brgy. Sambag 2, Dakbayan sa Sugbo.
Ang batan-ong pusher gihulagway sa kapulisan nga idlas, igsuon sa usa ka gikatahapang drug lord nga namatay na.
Si Mary Joy Villamala, 24, alias “Joyjoy”, dunay anak, taga Brgy. Sambag Dos, nakuhaag 11 ka putos sa shabu, usa ka ka bulto nga subject sa buy-bust nga mobalor og P10,000 ug upat ka medium nga bulto.
Si P/Major Eduard Sanchez, hepe sa Abellana Police Station sa Cebu City Police Office (CCPO) nga nahinabi sa Superbalita Cebu nibutyag nga ang drugas nga nakuha nila sa possession ni Villamala motimbang og 200 gramos nga mobalor og P1,330,000 base sa Dangerous Drugs Board (DDB) value.
Gihulagway ni Sanchez, nga “drug princess” si Villamala nga giingong high value target (HVT).
Kini tungod kay si Sanchez nalakip na sa listahan sa Philippine Drug Enforcement Agency (PDEA) 7, Drug Enforcement Group (DEG) 7, Regional Intelligence Division (RID) 7.
Giingon nga ang iyang mga transaction o mabaligya kinilo na matag semana.
Matod pa ni Sanchez nga si Villamala igsuon sa namatay nga druglord sa Sambag 2 nga si Frederick “Wewe” Villamala.
Si Frederick napatay sa PDEA agents niadtong Agusto 2017 tungod kay giingong nihata pagsukol atol sa buy-bust.
Dugang ni Sanchez, nga si Villamala, idlas kay magbalhinbalhin ang tagoan sa iyang mga transaction sa drugas.
Sa ilang nakuhang impormasyon, ang drugas ni Villamala gikan ni Kerwin Espinosa.
Si Villamala, nga nahinabi sa Superbalita Cebu nihimakak nga iyaha ang drugas.
Matod niya nga iyaha nalang ipatubag sa iyang abogado ang ubang mga pangutana.