LEYTE - Duha ka mga piniriso gikan sa Eastern Visayas nga nakagawas gumikan sa good conduct time allowance (GCTA) nitahan sa kapulisan.
Sa lungsod sa Villaba, Leyte, nitahan si Ireneo Busano, alyas Pitoy, 86, taga Barangay Balite, Villaba.
Si Busano nasentensyahan niadtong Marso 23, 2004 sa Regional Trial Cour Branch 17 sa Palompon Leyte, kini tungod sa kasong Qualified Rape.
Gibilanggo sa Abuyog Penal Colony si Busano ug nakagawas niadtong Marso 22, 2019 ubos sa Republic Act 10592 kun GCTA law.
Gidokumento sa Villaba Police Station ang pagtahan una pa siya gibalik sa Leyte Regional Prison sa Abuyog.
Nitahan usab sa Victoria Police Station sa Northern Samar ang laing binilanggo nga nakagawas ubos sa GCTA.
Si Nimbrod Purog, 51, taga Barangay Libertad, Victoria, nitahan sa kapulisan sa lungsod.
Nabilanggo si Purog sa New Bilibid Prison sa Muntinlupa City ug nakagawas niadtong Abril 10, 2019.
Base sa datos, tulo ka mga binilanggo gikan sa Eastern Visayas ang nakagawas gumikan sa GCTA.
Sila ningtahan nakagawas human nimando si Presidente Rodrigo Duterte nga pa-surenderon sila sud sa 15 ka adlaw.
Ang GCTA nakontrobersyal human makagawas ang mga kombiktado sa heinous crimes nga di unta angay nga makapahimus niini kay wa maapil sa balaud.
Gisusi karon sa Senado kon nganong gipagawas sa Bureau of Corrections (BuCor) ang mao nga mga tawo, labina dunay mga pagduda nga dunay nakakwarta. (JKDP)