TEMPORARYO una nga ipahimutang sa usa ka bahin sa Homecare Center sa Sitio Tugas, Brgy. Gun-ob, dakbayan sa Lapu-Lapu ang ma-rescue nga mga dunay deperensya sa pangisip sa kagamhanan sa dakbayan.
Kini ang gipahibawo ni Lapu-Lapu City Mayor Junard “Ahong” Chan nunot sa ilang kampanya sa paghipos sa mga adunay deperensya sa pangisip nga naglaroy-laroy sa kadalanan sa dakbayan.
Duna na untay duha ka mga “mentally challenged” nga mga tawo nga na-rescue ang kagamhanan human gisugdan ang ilang kampanya.
Ang usa giingong gikuha ug balik sa iyang kabanay samtang ang usa gi-refer unta nila sa Vicente Sotto Memorial Medical Center VSMMC apan gipauli ra usab human nga makamao kini manubag sa mga doktor nga miatiman.
Aron kalikayan nga mobalik sa kadalanan ang mga adunay deperensya sa pangisip nga ma-rescue buot ni Chan nga temporaryo una silang ipahimutang sa laing building sulod sa Homecare Center compound.
Kadto lang hinuon dili kuhaon o atimanon sa ilang mga kabanay ang ilang ipahimutang sa Homecare.
Ang pagpang rescue sa mga adunay deperensya sa pangisip nga naglaroy-laroy sa kadalanan sa dakbayan nadesisyonan ni Chan human nga duha ka insidente sa pagpamato ug pagpamunal nga naglambigit sa mga tawong adunay deperensya sa pangisip ang nahitabo sa pampublikong mga lugar pipila ka semana ang nakalabay.
Duha ka mga tawo ang naangol sa maong mga insidente.
“Para ma-take care sila, maka-take ug medicine para makapahuway sila basin diay maulian,” mayod ni Chan.
Wala hinuoy angay kabalak-an ang mga children in conflict with the law CICL nga kasamtangang gipahimutang sa Homecare Center sa presensya unya sa mga adunay deperensya sa pangisip nga ipahimutang sa nahisgotang pasilidad sanglit lahi man kini nga bahin sa gipuy-an sa mga menor de edad.
Lain usab kini og gate ug aduna usay gwardiya.
Ila usab nga pahibaw-on ang Department of Social Welfare and Development (DSWD) sa ilang plano sa paggamit sa usa ka bahin sa Homecare.
Sa pakisusi ni Chan moabot sa dul-an 10 ka mga tawo nga adunay deperensya sa pangisip ang naglaroy-laroy sa pampublikong lugar sa dakbayan.
“Katong dili mga taga diri (Lapu-Lapu) ato silang ihatod sa ilang lugar kay nakasuway na ta sauna taga Mandaue atong gihatod sa ila sa Umapad” matod ni Chan. (GCM)