ANG nagkaminus nga gidaghanon sa mag-uuma, mao ang hagit karon sa Department of Agriculture (DA) 7 hilabi na nga wala na’y batan-on nga gusto mag-uma.
Mao kini ang gibutyag sa Regional Director sa DA-7 Atty. Salvador Diputado atol sa paghatag og pasidungog sa mga nagkadaiyang mag-uuma ug mga kooperatiba sa Central Visayas.
Kagahapon, adlawng Martes, Septiyembre 10, pipila ka mga mag-uuma ang gipasidunggan sa DA 7 atol sa Outstanding Agricultural Achievers Awards 2019.
Gikan sa kapin 30 ka mga gipasidunggan, unom niini ang madala sa national level competition.
Naglangkub kini sa Catulayan Community Multi-Purpose Cooperarive isip Outstanding Barangay Food Terminal nga gikan sa San Juan, Siquijor; Jagna Calamay Producers Cooperative isip Outstanding Agri-Entrepreneur nga gikan sa Jagna, Bohol; Manga National High School 4H Club isip Outstanding Young Farmer Organization nga gikan sa Tagbilaran City, Bohol.
Nalakip usab ang Karl Nonnan Endres isip Outstanding Small Animal Raiser nga gikan sa Batuan, Bohol; Luz Bador isip Outstanding Rural Woman sa Sta. Catalina, Negros Oriental; ug ang Bayawan City FARMC isip Outstanding FARMC nga gikan sa Bayawan, Negros Oriental.
Gawas sa pasidungog, nakadawat usab og ganti nga salapi ang mga mananaog diin miabot ngadto sa P1.7 milyon ang gigahin.
Matod sa director nga angayan lang nga suportaran sa local government unit (LGU) ang pag-uma tungod kay halangdon kini ug usa kini sa gikinahanglan aron masustener ang food production.
Dugan niya nga adunay mga LGU nga nipatuman sa tagsa-tagsa ka mga school-based gardening tungod kay gawas sa mahibaw ang bata sa pag-uma, mamahimo usab kini nga magamit isip enterprenuership o pangita aron makanegosyo.
Andam ang DA 7 nga makig-coordinate sa Department of Education ug sa Technical Education and Skills Development Authority (TESDA) aron matubag ang mga nagkanihit nga gidaghanon sa mga batan-on nga mag-uuma. (HBL)