TUNGOD sa sunod-sunod nga mga disgrasya sa mga sakyanan ug motorsiklo sa Cebu South Coastal Road sa miaging mga semana, ang City of Talisay-Traffic Operations and Development Authority (CT-TODA) nakahuna-huna sa pagpatuman sa speed limit.
Kasagaran sa mga nalambigit sa mga aksidente ang kusog kaayo nga magpadagan nga mga dagkong truck, pribado nga mga sakyanan ug motorsiklo.
Aron estrikto kining mapatuman, nagplano ang CC-TODA sa pagpalit og tulo ka speed guns, hangyuon ang konseho sa pagpasar og ordinansa nga magtakda sa speed limit sa coastal road.
Nakuha sa gimontar nga mga closed circuit television (CCTV ) camera ang kasagaran sa mga disgrasya sa Cebu South Coastal Road, ilabi na sa may habig sa Siyudad sa Talisay.
400 ka aksidente
Ang Talisay City Disaster Risk Reduction and Management Office, sa miaging tuig lang hangtod sayo ning tuiga, nitala og 444 ka mga vehicular accident, 12 niini namatyan.
Sa tinguha nga maminusan kini o wa nay aksidente pa, naglaraw si Jonathan Tumulak, pangulo sa CT-TODA, nga estrikto nga pabutangan og speed limit ang mao nga karsada.
Uyon usab niini si Talisay City Mayor Gerald Anthony Gullas.
Aron adunay ngipon ang pagpatuman kalabot sa speed limit, makig-estorya siya sa konseho aron moduso og ordinansahon alang sa pagtakda ug pagpatuman sa speed limit.
Buot usab ni Gullas nga makigtagbo kang Cebu City Mayor Edgardo Labella, kon mahimo ba nga ma-uniform ang ilang speed limit tali sa Cebu City kay sumpay ra ang duha ka mga siyudad sa coastal road.
Naglaraw usab ang kagamhanan nga mopalit og tulo ka speed gun aron sa pagsukod sa gikusgon sa dagan sa usa ka sakyanan.