DUHA ka mga panimalay ang gilungkab sa wa mailhing mga suspetsado sa managlahing lugar ug higayon didto sa dakbayan sa Tagum.
Unang mipatala sa kapulisan ang biktimang si Wilfredo Bartulay, ug molupyo sa Purok Pine Tree, Mirafuentes District, Barangay North, siyudad sa Tagum.
Sumala pa ni Bartulay nga pasado alas 6:00 sa buntag niadtong Sabado, iyang nadiskubrihan nga ang iyang balay gisulod sa mga kawatan.
Nasuta sa biktima nga nahanaw ang iyang usa ka yunit nga laptop, ug Samsung nga cellphone nga mikantidad tanan og kapin P34-mil.
Dugang sa report nga ang mga suspek nakasulod sa balay sa biktima pinaagi sa pagguba sa screen sa bintana aron ilang kaagian pasulod og pagawas.
Samtang midangop sab sa kapulisan ang biktimang si Maryjane Tumulac, ug molupyo sa Jeth Village, Barangay Visayan Village susamang siyudad.
Pasado alas 4:45 sa hapon nadiskubrihan sa biktima nga ang iyang balay ang gisulod na sa mga kawatan.
Nakahimo sa pagsulod ang mga suspek pinaagi sa pagguba sa bintana aron ilang kaagian pasulod ug pagawas ug natangag ang mga gamit sa biktima sama sa iyang Motorola nga cellphone, Fuji Digital camera, ug kwarta balor P12,800.00.
Way nahimo ang biktima kung dili ang pagdangop na lamang sa kapulisan.
Samtang mga sakop sa Tagum City Police Station ang mihimo na karon og dugang imbistigasyon sa nahisgutang mga ransak nga nahitabo. (Marvin Pineda)