USA ka lalaki ang gipriso human gikatahong nananum og mga punoan sa marijuana sa iyang luna didto sa Purok 1, Barangay Sangab, lungsod sa Maco, Comval Province.

Ang suspek nailhan nga mao si Johnland Homwad, hamtung ang panuigon, ug molupyo sa Purok 1 Barangay Sangab.

Sumala sa report gikan sa Maco Municipal Police Station nga nasikop sa mga sakop sa kapulisan ang suspek human sa sumbong ni Kapitan Reynaldo Tagway sa nahisgutang barangay labot sa pagtanum sa suspek og mga punoan sa marijuana sa iyang luna.

Pasado ala 1:00 sa hapon niadtong Biyernes nasikop ang suspek didto sa susamang dapit.

Nasakmit sa mga otoridad ang wa pa matinong gidaghanun sa punoan sa giutuohang marijuana nga giibot didto sa luna sa suspek.

Ang suspetsado gidala gilayong ngadto sa presento sa kapulisan aron maimbistigahan.

Nagtingkagol na karon sulod sa selda ang suspek samtang ang kasong paglapas sa Republic Act 9165 kon Comprehensive Dangerous Drug Acts gihikay sa kapulisan batok niini.

Gihingusgan gayod sa kapulisan ang ilang kampanya labot ilegal nga druga ug silotan gayod nila ang bisan kinsang masakpang molapas sa balaud. (Marvin Pineda)