MGA estudyante nag-atubang na sab og suliran kung unsay ibayad sa ilang mga balayrunon sama sa tuition fee aron makakuha og eksaminasyon isip rekisitos nga mahuman ang ang school year 2009-2010.
Kini ang pamahayag ni Konsehal Mabel Sunga Acosta, chairperson sa Committee on Education sa Sangguniang Panlungsod.
Si Acosta nga mga estudyante dili makakuha og eksaminasyon sanglit gipatuman ang "No Permit, No Examination Policy" sa mga kolehiyo ug unibersidad sa siyudad.
Tungod sa maong palisa, ang Commission on Higher Education nagpaguwa og Memorandum Order No. 2 niadtong Enero 22, 2010 nga naghangyo nga dili ipatuman ang polisa nga nagbabag sa mga estudyante sa pagkuha og eksaminasyon gumikan kay wala nakabayad sa ilang tuition fee.
Si Acosta midayeg sa paningkamot sa CHED nga matabangan ang mga magtutungha sanglit alang niya ang kabataan dili angay hikawan sa ilang katungod sa edukasyon gumikan sa ekonomikanhong kawad-on.
Matud ni Acosta nga kinahanglan ang pagtinabangay sa tanang stakeholders aron matubag ang suliran sa mga tulunghaan sama sa pagkolekta sa balayrunon sa mga estudyante ug ang panginahanglan nga makakuha og eksaminasyon aron makompleto ang mga rekisitos sa eskwelahan.
Sa laing bahin, ang Junior Chamber International (JCI) Philippines mideklara kang Davao City First District Councilor Mabel Sunga Acosta isip regional winner sa "The Outstanding Councilors of the Philippines (TOCP) Awards for 2009".
Ang TOCP usa ka tinuig nga kalihukan uban ang buhatan ni Senator Edgardo Angara, Philippine Councilors League (PCL) ug JCI Philippines.
Ang TOCP anaa na karon sa ikaduhang tuig, nagtinguha nga marekognisa ang mga lokal nga magbabalaod sa ilang dedikasyon ug mga kalampusan nga nakatabang sa ilang katawhan, kumunidad ug sa nasud Pilipinas.
Si Acosta moduyog sa ubang mga regional winners alang sa final judging diin pilion ang nasyunal nga mananaog.
Sa tanang regional winners, napulo lang ka mga konsehal ang iproklama nga mananaog sa "The Outstanding Counsilors of the Philippines". Ang awarding ceremony pagahimuon karong Maso 12, 2010 sa Philippine Councilors League (PCL) End Term Conference didto sa Cebu. (AD)