NGANO man nang dalaga nga bag-o tang silingan nga di man managad?” ni Remy kang Panggay nga suod niyang silingan sa Purok Lemonsito, Barangay Gun-ob, nianang buntaga.
“Kinsa bay buot mong ipasabot?” tubag-pangutana ni Panggay.
“Si Digna god, kanang anaa tipon sa ilang Bobby-Sitas.”
“Ambot ana, uy, nga palitunon man kaayo ang pahiyom anang bayhana.”
“Bitaw pirme lang nagmugtok ang nawong.”
“Siya ra man poy nag-iningon ana. Ang uban diha nga bag-ong nagpuyo nga nangipon lang sa ilang mga kadugo matinagdanon man. Kana siya, kon di mo tikdulan, di gyud motingog.”
“Hasta ang akong bana nakamatikod usab sa maong kinaiya ni Digna. Diha kunoy nagkasakay sila sa dyip gikan sa Mandaue iyang gipahiyuman apan wa gyud mobawos. Samag wa makaila. Buot gani unta niyang apilan og plete apan wa na lang kay wa man managad.”
“Kinsa poy ganahan moplete sa maong batasan,” ni Panggay. “Abi mo, duna bayay bugti ang matag kinaiya ug binuhatan sa tawo.”
“Bitaw, apan di lang ta mag-ampo nga mao nay mahitabo. Ang Diyos ray nasayod sa tanan.”
Dili pa dugay nga nagpuyo si Digna sa Purok Lemonsito. Taga Leyte siya apan nahisay-a sa dakbayan aron manrabaho. Mitipon siya sa ilang Sitas-Bobby kay iya mang ig-agaw si Sitas. Ug pipila ka adlaw sukad sa iyang pag-abot nakasulod dayon siyag trabaho sa usa sa mga kompaniya sa MEPZA. Busa sa iyang pag-estar sa ilang Sitas maghatagan lang siyag binulan isip abang sa kuwarto nga iyang giukopahan.
Sa edad nga 23, wala pay uyab si Digna kay labihan lagi ka-estrikta ug kagarbusa. Diha unta kadtoy nag-ibid-ibid kaniyang ulitawo, si Alex, apan wala makaagwanta sa iyang taras. Si Adoy usab misuway pagtirada apan wala gihapon makadama. Daghan pang ulitawo sa Purok nga nangiliyupo sa iyang gugma apan wala gyud niya lingia.
Samtang nagtrabaho nagpadayon usab si Digna sa pagtuon sa kolehiyo kay tinguha lagi niyang makahuman og kurso pamasin nga ma-promote sa iyang gitrabahuan. Nagtungha siya magabii sa UCLM sa kursong Computer Science. Apan usa ka gabii niana, sa iyang pagpauli, labihang ngitngita sa dalan paingon sa iyang gipuy-an. Layo-layo man god kini gikan sa dalan nasyonal. Atol usab nga brownout niadtong tungura ug mag-alas 10:00 na sa kagabhion. Wala usay Buwan nga nagpakita sa langit kay nagdag-om man.
Mihinay-hinay lang siya pagsubay sa gamayng dalan iniwagan sa flashlight sa iyang selpon. Apan pag-abot niya sa unahan, ubos sa dakong punoan sa kahoy, kalit lang dihay anino nga mitungha sa iyang atubangan ug milayog kaniya. Gisap-ungan ang iyang baba ug gibunlot paingon sa kasagbutan ug kasagingan. Misuway unta siya paglugnot apan walay nahimo ang iyang kusog sa kusog sa lalake nga midala kaniya sa awaaw nga dapit.
NIANANG pagka buntag maoy gisawo-sawo nga estorya sa mga tawo sa Purok Lemonsito ang paglugos og pagpatay kang Digna, ilabi na sa managhigalang Remy ug Panggay.
“Uy, Gay, nahibawo ka ba sa balita?” “Unsa bang balitaa?”
“Bahin god sa paglugos ug pagpatay kang Digna!”
“Ha? Gilugos si Digna?”
“Oo, ug wa pa mailhi kinsay naghimo sa ingon.”
“Mao ba? Mao tingali nay bunga sa iyang kagarbusa.”
“Di lang ta mohukom, Gay, kay ang Ginuo ray nasayod sa tanan. Pagbuot tingali Niya nga mao nay dangatan ni Digna.” (KATAPUSAN)