DEAR Noy Kulas,
Tagoa lang ko sa ngalan nga Dimie. Mag-brod lang ko nimo kay wala ko kahibawo kon maguwang ka ba nako or manghud ba kay 59 years old naman ko, minyo ug naa nay mga apo.
Adunay koy anak babaye nga naminyo og foreigner. Gipaadto ang akong anak sa US ug didto sila kasla. Nakabaton silag duha ka mga anak Kining iyang bana more than 60 years old ug retired na.
Nianhi sila sa Pilipinas unya gipaeskwela ang akong anak.
Karon wa nay gusto ang akong anak sa iyang bana kay wa kuno siya respetuhi, murag way bili. Silbi iyang rights pagka asawa wa mahatag sa iyang bana sud na sa dugay ng panahon. Mga 9 years na ni silang nagpuyo. Iya lang giagwanta. Wa ihatag ang katungod sa akong anak sa pension niya ug sa pension sa mga bata. Gusto pud ang iya rang bana maoy matuman, dili paminawon ang akong anak. Mag sige na lang silag away, worst, atubangan sa mga bata. Kausa nalaparohan kuno ang akong anak.
Karon, naa ba kahay katungod ang akong anak sa pension sa mga bata? Makuha ba niya ang pension sa mga bata kon sila magkabulag? Gusto ang akong anak nga magbuwag na sila, pero ang laki dili mosugot. Unsa pa kaha ang mga benefits nga makuha sa akong anak kon sila magkabulag? Nag rent lang ni sila og apartment dire sa Bohol. Wa magpa pension ang akong anak as a result sa retirement sa iyang bana, tungod kay mobalik pa kuno siya sa US inig human og eskwela.
Daghang salamat.
DIMIE
Dim,
Sorry nga dugay kaayo nakong natubag ang imong suwat. But gi-publish ko gihapon ni kay dunay uban nga susama nimog problema.
Ubos sa atoang balaud, mapugos ang bana sa paghatag og suporta ngadto sa imong anak ug mga bata kay legally married man sila bisan sa Estados Unidos pa ang kasal, obligado ang bana labina kon way income ang imong anak. Ubos sa atoang balaud, ang bana kinahanglan nga mo-support sa asawa, di lang sa mga bata ang iyang obligasyon.
Ayaw lang pabiyaa ang imong anak sa iyang bana kay kini act of abandonment, labina kon molanat na og tulo ka mga buwan. Pasultihi niya ang iyang bana. Mas maayo usab nga mosuwat siya sa US Embassy aron mapugos nang Kano sa paghatag sa tipik sa pension niya nga rang giugom. Aron usab makita nianang tawhana nga di siya makasayonsayon dinhi sa Pilipinas, sama sa ubang mga langyaw nga ubos kaayog pagtan-aw nato.
NOY KULAS