DUHA ka mga tulisan ang miatake sa alas 3:00 sa kaadlawon kagahapon sa usa lady attendant sa Minute Burger nga nahimutang sa Ubalde, R. Castillo, siyudad sa Davao.

Mga tulisan malampusong mitangag sa P6,000.00 nga halin ni Ann Vistal Macsod, 27, dalaga, nagpuyo sa Barangay Ubalde, ning siyudad.

Base sa blotter sa Sta. Ana Police Station, usa ka tawo ang miduol ug nagtakuban nga kustomer mao nga giatiman siya ni Macsod.

Ang maong tawo gilarawan nga nagpangidaron og 20 anyos, 5'4" ang gitas-on, nagsul-ob og blue nga jacket ug nagkalo.

Si Macsod nagbutyag nga pipila ka minuto ang milabay miabot ang usa ka tawo nga nagbitbit og armas dayon mideklara nga hold-up.

Ang maong tawo giingon nga nagtabon og pula nga panapton sa iyang nawong dihang gitionan niya ang biktima.

Tungod sa kahadlok sa biktima, wala na siya nakapugong sa kauban niini nga milimas sa iyang halin niadtong higayona.

Mga tulisan, human nakuha ang ilang tuyo, daling misakay sa usa ka motorsiklo dayon mipadagan paingon ngadto sa Agdao Proper.

Naniid na karon ang kapulisan sa maong lugar sa pamasin nga dunay nakaila sa mga tulisan, ni Police Senior Inspector Ranulfo Caba¤og, hepe sa Sta. Ana Police Station.

Sa laing bahin, usa kalabera sa tawo ang napalgan sa alas 7:30 sa buntag niadtong Sabado didto sa Sta. Lucia Property, Purok 6, Barangay Communal, distrito sa Buhangin, siyudad sa Davao.

Ang kalabera giila sa iyang igsuon pinaagi sa gisul-ob niini nga brown short pant ug stripe nga polo shirt nga mao si Adonis Torres, 75, nagpuyo sa maong barangay.

Si Torres napalgan nila PO2 Ruben Corsino sa Buhangin Police Station ug A2C Carlito Callano Jr. sa Philippine Air Force kinsa nagpailawom og training sa dapit diin napalgan ang biktima.

Si Lippy Torres, igsuon sa namatay kinsa giingon nga dunay deperensiya sa pangisip, nagbutyag nga nahanaw ang iyang igsuon sa niadtong Pebrero 6, 2010.

Ang kalabera atua karon gipahiluna sa Rivera Funeral Homes samtang giandam ang iyang katapusang pahulayan. (AD)