SECTIONS
Sunday, September 22, 2019
SUPERBALITA CEBU

Niñal: Akong Max Surban top hits

Eskina

UNYA, mousab pa mo?” pinasuko nako nga pangutana sa akong mga bata human nako gibawi ilang gadgets kay di na maminaw ang mga kugtong kon tawgon.

Ug pinaagi sa kanta nagdungan og tubag ang duha, “Di na gyod ko mousab, kausa na lang,” dayong pangatawa.

Kon uban pa ning ginikanan, gibunalan na tingalig silhig ning mga kanahan tungod kay nagbugalbugal. Apan di nako sila pwedeng kasab-an kay ako ra man sab ang nagtudlo nila ani nga kabuang.

Ingon ini ni. Matag Dominggo, way absent ang mga kanta ni Max Surban sa balay. Lami iyang mga kanta himoong background sa akong pag-andam og paniudto. Samtang magbali-bali ko sa sinugbang isda ug maghuwat nga ang monggos malata, mosabay kog kanta sa mga linya nga pamilyar na sukad pa sa akong pagkabata.

Usa ini ang kantang “Di Na Gyod Ko Mousab,” hangtod nga ang mga bata nakasag-o na lang sab ug moapil na nakog sing-al sa korus: “Di na gyod ko mousab, kausa na lang.”

Nakahinumdom ko ini tungod kay sa miaging semana, gi-chatan ko sa usa ka kauban nakong manunulat nga mihangyo kon mahimo bang mag-send ko niya og unsa para nako ang akong Top 8 Max Surban hits. Alang kuno ni sa ilang gitrabaho nga website para sa mga Bisaya.

Ah, kana ra diay, kasayon. Ako siyang gitando. Apan nasayop ko. Dihang naminaw na ko sa mga kanta ni Max Surban aron magpili og walo nga akong labing paborito, di man diay sayon. Pagkataas man diay sa pilianan.

Kahibawo na ko daan nga daghan siyag nindot nga kanta. Apan kini nga kamatuoran gihapak sa akong agtang dihang gitagsa-tagsa na nakog paminaw ang iyang mga album. Naglisod kog pangita sa akong walo nga labing paborito kay anugonan ko nga di maapil ang uban.

Niadtong Domingo, nakahimo gyod kog shortlist sa akong ganahan nga mga kantang Max Surban aron maoy akong pilian sa akong walo nga labing paborito.

Apil na dinhi ang “Gihidlaw Na Intawon Ako,” “Ang Manok Ni San Pedro,” “Unang Pagtan-aw og Sine,” “Pakaslan,” “Di Na Gyod Ko Mousab,” “Kinabuhing Bukidnon,” “Kodaker,” “Turagsoy,” “Barkong Karaan,” “Si Iko ug si Ika,” “Amateur Hour,” “Kuradang,” “Opaw,” “Diskoral,” “I Love My Titser.”

Ug samtang gibalik-balik nakog paminaw ang mga kanta, nakapanghupaw ko nga gimingaw sa nanglabayng panahon sa akong kabatan-on.

Nangutana ang duha ka bugoy kon ok ra ba ko. “Ok ra ko mga kids,” mitubag ko. “Naa lang koy nahinumdoman.”

Ug dayon nagdungan ang duha, “Unya, mousab pa ka?” Ug wa na mi makakanta sa korus kay sige na mig katawa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph