SUPERBALITA CEBU

Barrita: Life sentence o death penalty?

Tipik sa Balaod

DUHA ka mga magbabalaod nisugyot og mga solusyon sa iskandalo nga nahitabo tungod sa good conduct time allowance (GCTA) nga nisangpot sa pagpagawas sa 1,915 ka mga konbiktado sa mga heinous crimes, sa mga linuog nga krimen.

Nabutyag kini sa dihang nahibaw-an nga gisuwayan sa pagpagawas gikan sa National Bilibid Prisons si kanhi mayor Antonio Sanchez sa Calauan, Laguna. Si Sanchez gisilotan og siyam ka reclusion perpetua nga tag 40 anyos, hangtod sa 360 ka tuig.

Sa gihimong pakisusi sa Senado mahitungod sa Republic 10592, ang GCTA Law, nitumaw nga gipangurakot ang pagpagawas sa mga konbiktado sa mga heinous crimes. Si Senador Panfilo “Ping” Lacson niingon nga ang binayranay gikan sa P50,000 hangtod sa P1.5 milyones matag konbiktado.

Ang gipasanginlan sa kadagkoan sa Bureau of Corrections mao ang giingon nga hanap nga probisyon sa GCTA Law ug sa implementing rules and regulations (IRR) niini. Bisan pa kon klaro kaayo sa maong balaod nga di makapahimus ubos niini kadtong mga recidivists, mga habitual offenders ug ang nag-atubang sa mga heinous crimes.

Kini nagkanayon, “recidivists, habitual delinquents, escapees and persons charged with heinous crimes are excluded from the coverage of this Act.” Gisaling-it kini sa probisyon sa preventive detention, apan ang exclusion di lang sa preventive suspension, kon di, sa tibuok balaod (this Act). Hain man ang way klaro ana?

Apan dunay misugyot og solusyon aron di dayon makagawas kadtong mga konbiktado sa mga heinous crimes. Si Kongresista Eduardo Gullas sa primero disitrito sa lalawigan sa Sugbo niingon nga ang solusyon mao ang life senctence without parole.

Sa life sentence, tibuok kinabuhi ang pagkabilanggo ug di gyud makabuhi kon way parole. Sa reclusion perpetua, 40 anyos ang pagkapriso ug mahimong parolado ug makagawas human sa 15 ngadto sa 20 ka tuig nga pagkatanggong.

Samtang si Senador Ronald “Bato” Dela Rosa nagtuo nga di unta motumaw kining maong iskandalo sa GCTA kon duna pay death penalty. Ning paagiha, makagawas man tuod ang konbiktado sa heinous crimes, apan patay na, human sa pagbitay niya.

Apan ingon sa nakalimtan nga ang tinubdan, ang lintunganay nga hinungdan sa maong iskandalo, mao ang sayop sa interpretasyon sa maong balaod. Ang balaod mismo sakto na. Di makapahimus sa GCTA Law ang mga recidivists, habitual delinquents ug kadtong nag-atubang ug heinous crimes.

Nakalimtan sab kadtong nangurakot ginamit ang sayop nga interpretasyon sa balaod aron makagawas kadtong mga konbiktado sa mga linuog nga krimen nga angay mosilbi sa hingpit sa ilang mga sentensiya didto sa bilangguan. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph