SECTIONS
Sunday, September 22, 2019
SUPERBALITA CEBU

Editoryal: Di maoy masulbad

HUMAN sa sunodsunod nga mga paghikog sa duha ka mga taytayan sa Mactan ug paninguha sa kapulisan nga masanta na kini, ang Mactan-Cebu Bridge Management Board mohimo na usab og mga lakang.

Usa sa mga policy nga ipatuman mao ang pag-ban sa mga biseklita nga makaagi sa duha ka mga taytayan. Kining mao nga lakang seguradong protestahan di lang sa mga trabahante nga nagsalig sa biseklita isip transportasyon ug moagi sa duha ka bridges, ang biking community sa Sugbo mosupak usab.

Ang Sugbo dunay liboan ka mga siklista kon basehan ang gidaghanon sa mangapil sa mga dagkong biking event dinhi sa Sugbo. Ang Mactan island usa sa mga paboritong rota sa mga siklista, labina ang Cordova nga maoy nahimutangan sa sikat nga bakasi.

Gawas sa mga siklista nga tigduawan, duna usay gatusan ka mga siklista nga nagpuyo sa isla nga motabok usab padung sa mainland.

Kining mga tawhana naggamit sa biseklita isip ehersisyo o kaha pang-ensayo sa apilan nga mga torneyo.

Ang pag-ban sa magbiseklita sa pag-agi sa taytayan di sulbad sa mga kaso sa hikog. Gani, sa 100 ka mga kaso sa hikog diha sa duha ka mga taytayan, maorag 99 porsyento nagsakay og four-wheeled nga mga sakyanan o kaha naglakaw lang.

Kon gusto sa board nga hingpit nga masumpo ang mga hikog sa duha ka mga taytayan, higpitan kini pagbantay aron ma-discourage ang si bisan kinsa nga gustong moambak sa duha ka bridges. Namatud-an na sa kapulisan nga ang pagbantay epektibo kay nakapugong na silag pipila ka mga tawo nga magpakamatay unta sa taytayan.

Gawas sa mga pulis, ang mga barangay nga ubos sa ilang jurisdiction ang duha ka mga taytayan, patabangon pagbantay. Kon gahinan kini sa board og gamay cash nga incentive, tingali madasig ang mga tanod sa pagbantay sa duha ka mga taytayan.

Mas maayo pa ni nga lakang kay klaro ang resulta, di ang pag-ban sa biseklita.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph