USA ka bagyo nga gilantawang mosulod sa Philippine Area of Responsibility (PAR) karong Biyernes, Septiyembre 13, nga magdala og mga pag-ulan sa habagatang bahin sa Luzon, Kabisay-an ug amihanang bahin sa Palawan.
Usa ka tropical depression ang gi-monitor sa Phillippine Atmospheric, Geophysical and Astronomical Services Administration (PAGASA) nga naa sa 1,495 kilometros nga gilay-on gikan sa Eastern Visayas, gawas pa sa PAR.
Atol sa pagsulod niini sa PAR, ika-13 na kini nga bagyo nga nakasulod sa nasud ning tuiga. Ang bagyo pagatawagon og “Marilyn”.
Suma pa ni Jhomer Eclarino, weather specialist sa Pagasa-Visayas nga wa pa sila ni-issue og gale warning.
Apan mipahimangno sila sa katawhan nga delikado na ang paglawig sa kadagatan labi na sa mga gagmayng sakayang pandagat tungod sa gidalang mga bawod ug kusog nga hangin ni Marilyn.
Pahimangno ni Eclarino para sa katawhan nga mosunod sa precautionary measures sa Pagasa ug magmatngon sa peligro nga gidala sa bagyo, lakip na ang landslide ug flash floods.
Sa pagkakaron, wa pay nakita ang Pagasa nga mo-landfall ang bagyo sa bisan asa nga parte sa nasud.
Way klase
Pipila ka lugar sa Eastern Visayas ang nideklarar na og class ug work suspension, Miyerkules, Septiyembre 11, 2019 gumikan sa hulga sa bagyong Marilyn.
Sa paghimo ning balita, mao kini nga mga lugar ang nagdeklara og class ug work suspension:
Tacloban City, niluwat og kamanduan si Mayor Alfred Rumualdez nga suspensuhon ang trabaho ug klase sa tanan lebel dakbayan sugod ala una sa hapon, Miyerkules.
Catbalogan City, gisuspenso na usab ang klase sa pre-school, elementary ug high school sa private ug pampubliko nga tunghaan.
Tunga, Leyte, gisuspenso na usab ang klase sa tanan lebel sa pribado ug pampubliko nga tunghaan. Daram sa Samar, gikansela na usab sa samang adlaw ang tananG klase sa pampubliko nga tunghaan.
Suspendido na usab ang tanan klase sa lalawigan sa Biliran ug lungsod sa Barugo, Leyte. (JKDP, KFD)