PAGKAHUMAN sa classification phase niadtong Lunes sa gabii, opisyal na nga nangiwit ang Gilas Pilipinas sa 32 ka mga nasod nga ningkombati sa 2019 FIBA Basketball World Cup sa China.
Ang Team Pilipinas ninghuman sa matag upat ka mga tuig nga kompetisyon nga wala’y daog sulod sa lima ka mga duwa diin upat niini, taga liog ang pagkalubong sa mga Pinoy.
Sa katapusang duha ka mga sangka sa classification phase, ang Jordan nakalabni sa nag-inusara nilang kadaugan dihang ilang napilde ang Senegal, 79-77 sa Group P samtang mingdaog ang Montenegro batok sa Japan, 80-65, sa Group O.
Kining maong mga resulta mao ang nagtukmod sa Gilas Pilipinas sa ika-32 nga puwesto.
Sama sa Gilas Pilipinas, ang Japan, Senegal ug Ivory Coast pulos wala’y daog sulod sa lima ka mga duwa apan nalabay sa labing ubos nga luna ang Team Pilipinas gumikan sa -147 point differential niini.
Ang Japan adunay -130 pd, ang Senegal kay -102 pd samtang ang Ivory Coast kay -74 pd.
Dihang paingon pa ang katapusang adlaw sa classification phase, ang Jordan delikado nga maoy mangiwit hinungdan nga nagkinahanglan silang modaog batok sa Senegal.
Tuod man, napukan sa Jordan ang Senegal aron paglugnot gikan sa grupo sa mga wala’y daog sa kompetisyon. Ang Jordan adunay 1-4 nga rekord.
Nasinati kini sa Gilas Pilipinas gumikan sa kadagko sa labaw sa ilang mga kontra hilabi na ang batok sa Serbia diin nabiyaan og 59 puntos ang mga Pinoy.
Nagkanayon si Gilas Pilipinas coach Yeng Guiao nga nasagmuyo ang kinatibuk-an nilang puwersa sa ilang nasinati.
“Of course we’re disappointed,” matod ni Guiao sa interbyu sa Spin.ph.
“Of course, may ano, meron tayong mga lessons na matutunan dito sa experience natin. And at the same time, I guess it’s time to re-evaluate our position.”
Matod ni Guiao nga mohatag siya og mga rekomendasyon sa kadagkuan sa basketball sa nasod basi sa iyang nakat-unan nga mga leksyon gikan sa mangil-ad nilang kampanya sa China.
Gipasabot ni Guiao nga siya ang angayang basulon sa nahitabo kanila ug dili siya gusto nga ang iyang mga nagduduwa mao ang madakdagan sa mga kantiyaw ug pagbasol.
Matod ni Guiao nga sa dili pa unta mangambisyon ang Gilas Pilipinas sa world stage, kinahanglan una niining patigbabawan ang Asya.
“Pagdating ng Asia, ayan Iran ang lakas, China ang lakas. Yung China natalo pa ng Nigeria,” pasabot ni Guiao.
“So even with the African countries, hirap ang Asia.” (ESL)