SI RIZAL Memorial Colleges (RMC) varsity scholar Arlan Arbois, Jr. miangkon sa ikaduhang titulo duha ka adlaw human siya nanguna sa Hunat Dabaw 7 Bubble Run for a Cause nga gihimo pagawas ug pabalik sa The Royal Mandaya Hotel, Dominggo, Septyembre 8.
Si Arbois, 22, college senior, giunhan sila Agustin Ychon ug Jeorge Andrade nga mihuman sa ikaduha ug ikatulo sa men’s 10K race sa tinuig nga aktibidad nga giorganisa sa The Royal Mandaya Hotel ka-partner ang GMA Kapuso Foundation.
“Nakaloy-an pud og nakaya nako nga mag-champion Saturday and Sunday,” niya sa pakighinabi sa SunStar Davao via Facebook.
Siya bag-uhay ra sab nga midaug sa 10K sa Digos half marathon, Sabado.
Niya, malipayon siyang naangkon ang back-to-back nga titulo taliwala sa lisud nga pagbansay.
“Wala ko nangandam ana nga dula Ma’am tungod kay hapit na ang Milo marathon diri sa Davao. Dala time trial napud nako to para pang Milo.”
Si Arbois, subling modagan sa men’s 21K sa National Milo Marathon Davao leg.
Samtang ang managanay gikan Emar Human and Environmental College (Ehec) nga si Diana Mae Memoracion, nga nanguna sa women’s 10K sa Digos half marathon, milabni sab sa Hunat Dabaw 7 runner-up honors diin siya nagsunod kang Esterlita Organiza sa Bukidnon. Ang uwahi maoy milangkat sa kampeyonato.
“Mga 200 meters or 300 meters among biya Ma’am murag gikapoy najud ko maong wala nako nigukod,” suma ni Memoracion.
Si Miki Tinol nabutang sa ikatulo.
Sa 5K, si Frits Lantako mipildi kang Mark Ruto ug Joselito Dugos alang sa titulo samtang si Clebel Guinayon gipukan sila Claire Mae Gaban ug Sharmaine Yonson alang sa titulo sa babaye.
Sila Daryl Mark Daban ug Angelica Papna sab nanguna sa men’s ug women’s 3K.
Ang Kapuso artists Benjamin Alves, Patricia Tumulak ug Thia Thomalla miapil sab sa dagan nga nagtumong sa pagtukod og tulay sa Barangay Mapula, Paquibato District, Davao City. (MLSA)